Láppis ja seailiduvvon girjegearru
1 Mun oidnen ahte su olgeš gieđas gii čohkkái truvnnus, lei girjegearru. Dan goappašat bealit ledje čállojuvvon dievva ja dat lei seailiduvvon čiežain seaillain. 2 Ja mun oidnen fámolaš eŋgela gii čuorvvui alla jienain: “Gii lea dohkálaš rabastit girjegearu ja doadjit dan seaillaid?” 3 Muhto ii almmis, ii eatnama alde iige eatnama vuolde lean oktage gii livččii sáhttán rahpat girjji ja geahččat dan. 4 Mun čirron bahččagit, go ii lean oktage gii livččii lean dohkálaš rabastit girjji ja geahččat dasa. 5 Muhto okta vuorrasiin celkkii munnje: “Ale čiero! Juda čeardda ledjon, Davida vesá, lea vuoitán! Son rabasta girjji ja doadjá buot čieža seailla.”
6 Ja mun oidnen go truvnnu ja njealji sivdnádusa ovddas ja vuorrasiid gaskkas čuoččui láppis. Dat lei dego njuvvojuvvon, ja das ledje čieža čoarvvi ja čieža čalmmi – dat Ipmila čieža vuoiŋŋa mat leat vuolggahuvvon oppa eatnamii. 7 Láppis bođii lagabui ja válddii girjji su olgeš gieđas gii čohkkái truvnnus. 8 Go Láppis válddii girjji, de dat njeallje sivdnádusa ja guokteloginjeallje vuorrasa luoitádedje su ovdii. Juohkehaččas lei hárpa ja gollelihti dievva suovvasat, bassi olbmuid rohkadusat. 9 Ja sii lávlo ođđa lávlaga:
Don leat dohkálaš váldit girjji
ja rabastit dan seaillaid,
dasgo don leat njuvvojuvvon
ja leat varainat oastán friddja Ipmilii
olbmuid buot čearddain ja gielain,
buot álbmogiin ja eatnamiin.
10 Don leat dahkan sin gonagaslaš álbmogin,
min Ipmila báhppan,
ja sii ráđđejit eatnama alde.
11 Mun oidnen truvnnu, sivdnádusaid ja vuorrasiid birra eatnat eŋgeliid ja gullen sin jiena. Sii ledje lohkameahttun ollu, logiduhát geardde logiduhát ja duhát geardde duhát, 12 ja sii čurvo alla jienain:
Láppis mii lea njuvvojuvvon,
lea dohkálaš oažžut fámu ja riggodaga,
viisodaga ja givrodaga,
gudni, hearvásvuođa ja rámádusa.
13 Ja mun gullen go buot sivdnádusat almmis, eatnama alde, eatnama vuolde ja mearas, buot mii dain lea, celke:
Su gii čohkká truvnnus,
su ja Lábbá lea máidnun, gudni,
hearvásvuohta ja fápmu
álo ja agálaččat.
14 Dat njeallje sivdnádusa vástidedje: “Amen”, ja vuorrasat luoitádedje muđolassii ja rohkadalle.