1 Vieljat, mun sávan olles váimmus ja rohkadalan Ipmila ahte sii bestojuvvošedje. 2 Mun sáhtán duođaštit ahte sii áŋgiruššet Ipmila beale, muhto sis váilu áddejupmi. 3 Sii eai dovdda Ipmila vanhurskkisvuođa, ja go sii vigget ráhkadit iežaset vanhurskkisvuođa, de sii eai vuollán Ipmila vanhurskkisvuhtii. 4 Kristus lea lága loahppa, nu ahte juohkehaš gii osku šaddá vanhurskkisin.
5 Moses čállá dan vanhurskkisvuođa birra maid láhka addá: Dat gii dahká daguid maid láhka gáibida, oažžu dain eallima. 6 Muhto oskku vanhurskkisvuohta cealká ná: Ale jurddaš váimmustat: Gii sáhttá mannat bajás albmái? – namalassii viežžat Kristusa vuolás – 7 dahje: Gii njiedjá čiekŋalassii? – namalassii viežžat Kristusa jábmiid luhtte. 8 Muhto maid dat cealká? Sátni lea du lahka, du njálmmis ja du váimmus. Dat lea dat oskku sátni maid mii sárdnidit. 9 Jos don dovddastat njálmmiin ahte Jesus lea Hearrá ja oskkut váimmus ahte Ipmil lea bajásčuoččáldahttán su jábmiid luhtte, de don bestojuvvot. 10 Váimmu oskkuin olmmoš šaddá vanhurskkisin ja njálmmi dovddastusain son bestojuvvo. 11 Čála cealká: Ii oktage gii osku sutnje, šatta heahpadii. 12 Dasgo ii leat erohus juvddálačča ja greikalačča gaskkas. Buohkain lea seammá Hearrá, ja son addá valjistis buohkaide geat čurvot su. 13 Dasgo juohkehaš gii čuorvu Hearrá nama, bestojuvvo.
14 Muhto mo sii sáhttet čuorvut su geasa eai oskko? Mo sii sáhttet oskut sutnje gean birra eai leat gullan? Mo sii sáhttet gullat, jos ii oktage sárdnit? 15 Mo oktage sáhttá sárdnidit, jos son ii leat vuolggahuvvon? Nugo lea čállojuvvon: Man čábbát leat daid lávkkit geat buktet buriid ságaid. 16 Muhto eai buohkat leat leamaš gulolaččat evangeliumii. dasgo Jesaja cealká: Hearrá, gii oskkui min sárdnái? 17 Osku boahtá gullamis ja gullan boahtá Kristusa sánis. 18 Mun jearan: Eaigo sii leat gullan? De leat: Sin jietna lea ollán miehtá máilmmi, sin sánit gitta eatnama ravddaide. 19 Mun jearan: Iigo Israel leat ádden dan? Moses juo cealká: Mun dagahan din gáđaštit álbmoga mii ii leat álbmot. Mun moaráhuhtán din jierpmehis álbmoga vuostá. 20 Ja Jesaja cealká vel roahkkadeappot: Dat geat eai ohcan mu, gávdne mu. Mun almmustuvven daidda geat eai jearran mu. 21 Muhto Israela birra son cealká: Geažos beaivvi mun lean geaigguhan gieđaid jeagohis ja nággáris álbmogii.