Dearvvuođat
1 Mun ávžžuhan din váldit vuostá oabbámet Foibe, Kenkrea searvegotti bálvaleaddji. 2 Váldet su vuostá Hearrás, nugo lea heivvolaš bassi olbmuide, ja veahkehehket su buot áššiin main son dárbbaša din veahki. Son lea ieš veahkehan eatnagiid, maiddái mu.
3 Celket dearvvuođaid Priskai ja Akvilai, mu bargoguimmiide Kristus Jesusis. 4 Soai leaba leamaš gergosat mannat heakkavárrii mu dihte. Sudno in giitte duššefal mun, muhto maiddái buot báhkiniid searvegottit. 5 Celket dearvvuođaid maiddái searvegoddái mii čoaggana sudno vissui. Celket dearvvuođaid mu ráhkis Epainetosii, gii lei Asia barggu vuosttaš šaddu Kristusii. 6 Celket dearvvuođaid Mariai, gii lea rahčan sakka din ovddas. 7 Celket dearvvuođaid Andronikosii ja Juniasii, geat leaba juvddálaččat dego mun ja mu fáŋgaguoimmit. Sudnos lea buorre beaggin apostaliid gaskkas, ja soai oskkuiga Kristusii ovdal go mun. 8 Celket dearvvuođaid Ampliatusii, mu ráhkis villjii Hearrás. 9 Celket dearvvuođaid Urbanusii, min bargoguoibmái Kristusis, ja mu ráhkis Stakysii. 10 Celket dearvvuođaid Apellesii, Kristusa oskkáldas bálvaleaddjái. Celket dearvvuođaid Aristobulosa dálu olbmuide. 11 Celket dearvvuođaid Herodionii, gii lea juvddálaš dego mun. Celket dearvvuođaid daidda Narkissosa viesu olbmuide geat gullet Hearrái. 12 Celket dearvvuođaid Tryfainai ja Tryfosai, geat áŋgiruššaba Hearrá barggus. Celket dearvvuođaid ráhkis Persisii, gii lea rahčan ollu Hearrá bálvalusas. 13 Celket dearvvuođaid Rufusii, gean Hearrá lea válljen, ja maiddái su eadnái, gii lea leamaš dego eadni munnje maid. 14 Celket dearvvuođaid Asynkritosii, Flegonii, Hermesii, Patrobasii, Hermasii ja vieljaide geat leat sin luhtte. 15 Celket dearvvuođaid Filologosii, Juliai, Nereusii ja su oabbái, ja Olympasii ja buot bassi olbmuide sin luhtte. 16 Buorástahttet guhtet guimmiideattet bassi cummáin. Buot Kristusa searvegottit celket didjiide dearvvuođaid.
17 Vieljat, mun rávven din váruhit sis geat dagahit riidduid ja jorralahttet din eret dan oahpas maid dii lehpet oahppan. Allet guoibmádala singuin. 18 Dakkár olbmot eai bálval min Hearrá Kristusa muhto iežaset čoavjji. Čáppa ja fillejeaddji sániiguin sii čádjidahttet ovttageardánis olbmuid. 19 Din jegolašvuohta lea beaggán buohkaide. Danne mun lean ilus din dihte ja sávan din leat čeahpit das mii lea buorre, muhto čuorbbit das mii lea bahá. 20 Vare ráfi Ipmil cuvkešii fargga Sáhtána din julggiid vuollái! Hearrámet Jesus Kristusa árbmu lehkos dinguin.
21 Mu bargoguoibmi Timoteus cealká didjiide dearvvuođaid, ja dearvvuođaid celket maiddái mu álbmoga olbmot Lukius, Jason ja Sosipatros. 22 Mun, Tertius, gii lean čállán dán girjji Hearrá bálvalusas, cealkkán didjiide dearvvuođaid. 23 Dearvvuođaid cealká didjiide Gaius, gii lea rahpan viesus munnje ja oppa searvegoddái. Erastos, gávpoga rehketdoalli, ja min viellja Kvartus cealkiba didjiide dearvvuođaid. 24 Hearrámet Jesus Kristusa árbmu lehkos dinguin buohkaiguin! Amen.
Máidnun
25 Máidnojuvvon lehkos Ipmil, geas lea fápmu nanosmahttit din mu evangeliumiin, mii lea sáhka Jesus Kristusa birra. Dan čiegusvuohta lea leamaš čihkkojuvvon agálaš áiggiid rájes, 26 muhto lea dál almmustuvvan profehtalaš čállagiin agálaš Ipmila gohččuma mielde, vai buot álbmogat dolvojuvvošedje oskku gulolašvuhtii. 27 Sutnje, áidna viissis Ipmilii, lehkos gudni ja agálaš rámádus Jesus Kristusa bokte! Amen.