Kristtalaččaid eallin máilmmis
1 Sártno dan mii soahpá dearvvas ohppui. 2 Gohčo vuoras olbmáid leat juguheamit, gutnálaččat ja jierpmálaččat, dearvasat oskkus, ráhkisvuođas ja gierdavašvuođas. 3 Vuoras nissonat galget maid eallit nugo heive bassi olbmuide. Sii eai oaččo sárdnut sealggebealde eaige leat viidneváibmilat, muhto galget oahpahit dan mii lea buorre. 4 Sii galget ávžut nuorra nissoniid ráhkistit iežaset boatnjá ja mánáid, 5 eallit jierpmálaččat ja buhttásit, dikšut bures ruovttuset ja leat boadnjáseaset vuolibuččat, vai Ipmila sátni ii bilkiduvvo.
6 Neavvo seammá láhkái nuorra olbmáid eallit mearálaččat 7 ja čájet ieš sidjiide ovdamearkka buriid dahkamis. Lehkos du oahpahus vuoiggalaš ja gutnálaš 8 ja sárdnun dearvvas ja láitemeahttun, vai juohke vuostálasti šaddá heahpanit, danne go ii máhte dadjat min birra maidege baháid.
9 Ávžžo šlávaid leat juohke dáfus vuolibuččat isidiiddáset ja sin miela mielde. Sii eai oaččo nágget vuostá 10 eaige suoládallat, muhto galget álo leat vuoiggalaččat ja oskkáldasat, vai sii juohke láhkái leat Ipmila, min Beasti, oahpa čikŋan.
11 Ipmila árbmu lea oainnat almmustuvvan bestojupmin buot olbmuide, 12 ja dat bagada min hilgut ipmilmeahttunvuođa ja máilmmálaš anistumiid ja eallit jierpmálaččat, vuoigatlaččat ja ipmilbalolaččat dán máilmmis 13 dan botta go mii vuordit go min ávdugas doaivu ollašuvvá ja min stuorra Ipmila ja Beasti Jesus Kristusa hearvásvuohta almmustuvvá. 14 Son attii iežas min ovddas vai beasai lonistit min buot vearredaguin ja buhtistit min su iežas álbmogin mii áŋgirit dahká buriid daguid.
15 Sártno ná, ávžžo ja cuiggot buot isitvuođain. Ale divtte ovttage badjelgeahččat iežat.