Ávžžuhus váidalit
1 Rabas uvssaidat, Libanon,
vai dolla beassá loaktit du sederiid!
2 Fuoikko, sypressa!
Sederat leat gahččan,
hearvás muorat duššaduvvon.
Fuikot, Bašana áikkat!
Suhkkes vuovdi lea njeidojuvvon.
3 Gullet guođoheddjiid luoibmasa,
sin čáppa guohtunbáikkit leat duššaduvvon.
Gullet mo nuorra ledjonat čergot,
go Jordana suovka lea billistuvvon.
Guokte guođoheaddji
4 Ná cealká Hearrá, mu Ipmil: Guođot njuovvansávzzaid 5 maid daid oastit njuvvet árpmuheamit. Dat geat vuvdet daid, dadjet: Máidnojuvvon lehkos Hearrá, mun lean riggon! Eai daid guođoheaddjitge seastte daid. 6 In munge šat seastte eatnama ássiid, cealká Hearrá. Mun attán olbmuid guhtet guimmiideaset gihtii ja gonagasaideaset váldái; sii duššadit eatnama, inge mun gájo ovttage sin gieđas. 7 Nu mun guođohin sávzagávppašeddjiid njuovvansávzzaid. Mun válden guokte soappi, nubbái mun bidjen namman Buorredáhttu, nubbáigis Oktavuohta, ja mun guođohin sávzzaid. 8 Muhto ovtta mánotbajis mun lihccon golbma guođoheaddji. Muhto mun šadden gierdameahttumin sávzzaide, ja datge dolke mus. 9 Mun dadjen: “Mun in dáhto šat guođohit din. Jápmoset dat mat leat jámadeamen, duššoset dat mat leat duššamin, ja dat mat velá báhcet, borroset guhtet guimmiideaset bierggu.” 10 De mun válden soabbán Buorredáhtu ja dodjen dan, ja nu loahpahin dan lihtu maid ledjen dahkan buot álbmogiiguin. 11 Dan beaivvi dat loahpahuvvui. Go sávzagávppašeaddjit oidne maid mun dahken, de sii ipmirdedje ahte dat lei Hearrá gohččun. 12 Dasto mun dadjen sidjiide: “Jos dii atnibehtet buorrin, de mákset munnje mu bálkká. Jos ehpet, de allet mávsse.” Dalle sii vihkkejedje munnje bálkán golbmalogi silbaruđa. 13 Muhto Hearrá celkkii munnje: “Bálkes ruđaid šolgejeaddjái, dan hearvás hatti man vearrasažžan sii atnet mu.” Nu mun válden dan golbmalogi silbaruđa ja bálkestin daid šolgejeaddjái Hearrá vissui. 14 De mun dodjen iežan nuppi soappi, Oktavuođa, ja nu loahpahin Juda ja Israela vielljavuođa. 15 Hearrá celkkii munnje: “Gárvot dal heajos guođoheaddji gárvvuid. 16 Mun oainnat divttán boahtit dán eatnamii guođoheaddji gii ii beroš dain mat čádjidit, ii oza daid mat láhppojit, ii dálkkas daid mat bártidit iige hága biepmu daidda mat leat dearvašat. Son borrá buoiddimusaid bierggu ja gaiku daid gaccaid.”
17 Vuoi dan heajos guođoheaddji
gii guođđá sávzzaid!
Vare miehkki deaivvašii su gihtii
ja su olgeš čalbmái!
Vare su giehta gálnnašii,
čáskkašii su olgeš čalbmi!