Saul jápmá
1 Filistalaččat soahttájedje israellaččaiguin. Israellaččat báhtaredje sis, ja ollugat gahčče Gilboavárrái. 2 Filistalaččat jukse Saula ja su bártniid ja godde Jonatana, Abinadaba ja Malkišua, Saula bártniid. 3 Soahti Saula birra šattai garasin. Dávgebáhččit áice su, ja son hávváduvai. 4 Dalle Saul dajai vearjoguoddásis: “Rohtte miehki ja rehtte mu! Muđui duot birračuohpakeahtes olbmát bohtet ja meannudit muinna bahás.” Muhto go vearjoguoddi ii duostan dahkat dan, de Saul ieš rohttii miehki ja bálkestahtii dasa. 5 Go vearjoguoddi oinnii ahte Saul lei jápmán, de songe bálkestahtii miehkkásis ja jámii. 6 Nu sii buohkat jápme, Saul ja su golbma bártni, ja nu nogai Saula soga gonagasvuohta.
7 Go Jisreela jalgadasa israellaččat gulle ahte soahteveahka lei báhtaran ja ahte Saul ja su bártnit ledje gahččan, de sii guđđe gávpogiiddiset ja báhtaredje. Filistalaččat ásse gávpogiidda sin sadjái.
8 Go filistalaččat maŋit beaivvi bohte rievidit gottáhallan olbmuid, de sii gávdne Saula ja su bártniid njaŋgámin Gilboaváris. 9 Sii rievidedje Saula gárvvuid ja válde su oaivvi ja vearjjuid. De sii gulahedje vuoitosága eahpeipmiliiddáseaset ja álbmogasaset. 10 Filistalaččat bidje Saula vearjjuid muhtun ipmileaset vissui, ja su oaivvi sii heŋgejedje Dagona tempelii.
11 Go Jabeša olbmot Gileadis gulle maid filistalaččat ledje dahkan Saulii, 12 de buot gávpoga soahteolbmát johttájedje ja vižže Saula ja su bártniid rupmašiid Jabešii. Sii hávdádedje sin dávttiid Jabeša terebintta vuollái ja fástudedje čieža beaivvi.
13 Nu jámii Saul, danne go son lei leamaš oskkáldasmeahttun Hearrái iige lean jeagadan Hearrá gohččuma. Son lei maid jearran neavvaga jábmiid vuoiŋŋain 14 iige Hearrás. Dan dihte Hearrá divttii su jápmit ja sirddii gonagasvuođa Davidii, Isaja bárdnái.