Juda sohkalogahallan joatkása
1 Juda bártnit ledje Peres, Hesron, Karmi, Hur ja Šobal. 2 Šobala bárdni Reaja sahkanahtii Jahata, ja Jahat sahkanahtii Ahumai ja Lahada. Dát ledje soralaččaid sogat.
3 Dát leat Etama bártnit: Jisreel, Jišma ja Jidbaš – sin oappá namma lei Haslelponi – 4 ja Penuel, Gedora áhčči ja Eser, Huša áhčči. Dát ledje Hura, Efrata vuosttašriegádeaddji ja Betlehema áhči, bártnit.
5 Ašhuris, Tekoa áhčis, ledje guokte áhká, Hela ja Naara. 6 Naara riegádahtii sutnje Ahussama, Hefera, Temni ja Ahaštara. Dát ledje Naara bártnit. 7 Hela bártnit ledje Seret, Sohar, Etnan ja Kos. 8 Kos sahkanahtii Anuba ja Hassobeba ja lei daid sogaid máddu mat surggiidedje Aharhelis, Haruma bártnis.
9 Jabes adnojuvvui alit árvvus go su vieljat. Su eadni gohčui su Jabesin ja dajai: “Mun riegádahtten su bákčasiin.” 10 Jabes čuorvvui Israela Ipmila ja dajai: “Vare don buressivdnidivččet mu ja viiddidivččet mu eatnama, divttášit iežat gieđa doarjut mu ja vealtadivččet mu lihkuhisvuođas ja bákčasis.” Ja Ipmil ollašuhtii dan maid son ánuhii.
11 Kelub, Šuha viellja, sahkanahtii Mehira, Eštona áhči. 12 Ešton sahkanahtii Bet-Rafa, Paseaha ja Tehinna, Ir-Nahaša áhči. Dát ledje rekalaččat.
13 Kenasa bártnit ledje Otniel ja Seraja, ja Otniela bártnit ledje Hatat ja Meonotai. 14 Meonotai sahkanahtii Ofra, ja Seraja sahkanahtii Joaba, Ge-Harašima soga máttu; sii ledje duojárat. 15 Kaleba, Jefunne bártni, bártnit ledje Ir, Ela ja Naam, ja Ela bárdni lei Kenas.
16 Jehallelela bártnit ledje Sif, Sifa, Tirja ja Asarel.
17 Esra bártnit ledje Jeter, Mered, Efer ja Jalon. Jeter sahkanahtii Mirjama, Šammaja ja Jišbaha, Eštemoa áhči. 18 Su áhkká gii gulai Juda čerdii, riegádahtii Jereda, Gedora áhči, Hebera, Soko áhči, ja Jekutiela, Sanoaha áhči. Meredis ledje bártnit maiddái farao nieiddain Bitjain, gean son lei váldán áhkkán. 19 Hodia lei váldán áhkkán Nahama oappá, ja su bártnit ledje garemlaš Delia, Keila áhčči, ja maakalaš Eštemoa.
20 Šimona bártnit ledje Amnon, Rinna, Ben-Hanan ja Tilon. Jiši bárdni lei Sohet.
21 Juda bártni Šela nális ledje Er, Leka áhčči, Lada, Mareša áhčči, ja Bet-Ašbea liidnegođđiid sogat, 22 ja maiddái Jokim ja Koseba olbmát ja Joaš ja Saraf geat ledje ássan Moabis ja dasto máhccan Betlehemii. Dát leat dološ muitalusat. 23 Sii ledje láirálihttedahkkit. Sii ásse Netaimis ja Gederas ja barge gonagasa bálvaleaddjin.
24 Simeona bártnit ledje Nemuel, Jamin, Jarib, Serah ja Saul. 25 Saula bárdni lei Šallum, su bárdni Mibsam ja su Mišma. 26 Mišma bártnit ledje Hammuel, Sakkur ja Šimi. 27 Šimis ledje guhttanuppelohkái bártni ja guhtta nieidda, muhto su vieljain eai lean máŋga máná. Danin sin sohka ii šaddan nu stuorisin go Juda sohka. 28 Sii ásse Beer Šebas, Moladas ja Hasar Šualis, 29 Bilhas, Esemis ja Toladis, 30 Betuelis, Hormas ja Siklagis, 31 Bet-Markabotis, Hasar Susimis, Bet-Biris ja Šaarajimis. Dát ledje sin gávpogat gitta dassážii go David šattai gonagassan, 32 ja sin ledje maiddái daid birasbáikkit. Sii ásse maiddái Etamis, Ajinis, Rimmonis, Tokenis ja Ašanis, dán viđa gávpogis, 33 ja buot dain báikkiin mat ledje daid gávpogiid birra, gitta Baala rádjái. Dát ledje sin ássanbáikkit, ja dát lei sin sohkalogahallan. 34 Mešobab, Jamlek ja Joša, Amasja bárdni, 35 Joel, Jehu – su áhčči lei Jošibja, su Seraja, su Asiel; 36 viidáseappot Eljoenai, Jaakoba, Ješohaja, Asaja, Adiel, Jesimiel, Benaja 37 ja Sisa – su áhčči lei Šifi, su áhčči Allon, su Jedaja, su Šimri, su Šemaja. 38 Dás namahuvvon olbmát ledje sogaideaset oaivámuččat, ja sin bearrašat sturro sakka. 39 Danin sii vulge Gedora guvlui, leagi nuorttabeallái, ohcat guohtuneatnamiid smávvaomiidasaset. 40 Doppe sii gávdne šattolaš ja buriid guohtuneatnamiid. Eanan lei viiddis, ja doppe lei jaskat ja muossái. Dat geat ásse doppe ovdal, ledje hamlaččat.
41 Dat geaid namat leat dása čállojuvvon, bohte dan áigge go Hiskia lei Juda gonagassan, ja sii billistedje hamlaččaid gođiid ja ássanbáikkiid mat doppe ledje. Sii duššadedje sin ja ásse sin eatnamii, danin go doppe lei guohtuneanan smávvaomiide. 42 Muhtumat sis, vihttačuođi Simeona čeardda olbmá, manne Seira várreeatnamii, ja sin njunnošis ledje Jiši bártnit Pelatja, Nearja, Refaja ja Ussiel. 43 Sii duššadedje maŋimus amaleklaččaid bázahasa ja ásset doppe veláge.