Várrehus bálvaleames eahpeipmiliid
1 Vieljažiiddán, mun dáhtun din diehtit ahte min áhčit ledje buohkat balvva vuolde ja manne meara čađa. 2 Sii buohkat ožžo balvvas ja mearas gástta Mosesa searvevuhtii. 3 Buohkat borre seammá vuoiŋŋalaš borramuša 4 ja juhke seammá vuoiŋŋalaš juhkamuša. Sii juhke dan vuoiŋŋalaš bávttis mii jođii singuin, ja dat bákti lei Kristus. 5 Dattetge Ipmil hilggui sis eatnaša, siihan duššaduvvojedje meahccái.
6 Nu sii šadde midjiide ovdamearkan: Mii eat oaččo anistuvvat bahái, nugo sii anistuvve. 7 Allet šatta eahpeipmiliid bálvaleaddjin, nugo muhtumat sis šadde. Čállojuvvonhan lea: Álbmot čohkánii borrat ja juhkat, ja de sii dánsugohte. 8 Allot furroš, nugo muhtumat sis furrošedje, ja nu sis gahčče ovtta beaivvis guoktelogigolbmaduháha. 9 Allot geahččal Hearrá, nugo muhtumat sis geahččaledje; sii gottáhalle gearbmašiidda. 10 Alletge nimmor nugo muhtumat sis nimmoredje; sin gottii Duššadeaddji.
11 Buot dat dáhpáhusat šadde midjiide ovdamearkan, ja dat leat muitaluvvon cuigehussan midjiide geat eallit maŋimuš áiggiid. 12 Dat gii gáddá leat čuožžumin, váruhehkos, amas jorralit. 13 Geahččalus mii din lea deaividan, ii leat dakkár maid olmmoš ii gierddaše. Ipmil lea oskkáldas, ii son divtte din geahččaluvvot áhpiideattet badjel. Go son sálle din šaddat geahččalussii, de son diktá maid šaddat nu ahte dii veadjibehtet dan gierdat.
14 Ráhkkásiiddán, allet nappo searvva bálvalit eahpeipmiliid. 15 Mun sártnun didjiide nugo jierbmeolbmuide. Árvalehket ieža maid mun dajan. 16 Buressivdnádusa gearra maid mii buressivdnidit, almma dat lea Kristusa vara searvevuohta? Láibi maid mii doadjalit, almma dat leat Kristusa rupmaša searvevuohta? 17 Láibi lea okta, ja nu miige leat okta rumaš vaikko leat eatnagat, danin go mii buohkat šaddat servvolažžan dan ovtta láibái. 18 Jurddašehket Israela álbmoga: Almma dat geat borret oaffarbierggu, leat servvolaččat áltárii? 19 Maid mun dalle oaivvildan? Mun in oaivvil ahte eahpeipmiliidda oaffaruššojuvvon biergu livččii mihkkege, dahje ahte eahpeipmilat livčče mahkkege. 20 Mun oaivvildan ahte eahpeipmiliid bálvaleaddjit oaffaruššet bahás vuoiŋŋaide eaige Ipmilii, inge mun dáhto din leat servvolaččat bahás vuoiŋŋaide. 21 Dii ehpet sáhte juhkat sihke Hearrá gearas ja bahás vuoiŋŋaid gearas, dii ehpet sáhte leat servvolaččat sihke Hearrá beavdái ja bahás vuoiŋŋaid beavdái. 22 Eat suige mii dáhto boktit Hearrá áŋgirvuođa? Leatgo mii mahkáš gievrrabut go son?
Oamedovdu ja friddjavuohta
23 Buot lea lobálaš – muhto ii buot leat ávkkálaš. Buot lea lobálaš – muhto ii buot duddjo buori. 24 Allos oktage bivdo iežas ávkki, muhto nuppi ávkki. 25 Dii oažžubehtet borrat buot mii biergobuvddain lea vuovdimassii, ehpetge dárbbaš guorahallat maidege oamedovddu dihte. 26 Eanan ja buot mii das lea, gullá Hearrái. 27 Jos muhtun eahpeoskkolaš bovde din ja dii dáhttubehtet mannat su guossái, de allet guorahala maidege oamedovddu dihte, muhto borret maid ihkinassii doppe didjiide fállet. 28 Muhto jos muhtun dadjá: “Dát lea oaffarbiergu”, de allet bora dan su dihte gii dajai, ja oamedovddu dihte. 29 Mun in oaivvil du oamedovddu muhto dan nuppi olbmo oamedovddu. Manne nuppi olbmo oamedovdu dubmešii mu friddjavuođa? 30 Jos mun giittán Ipmila das maid boran, manne mun dalle láitojuvvošin dan dihte mas mun giittán Ipmila? 31 Jogo dii nappo borrabehtet dahje juhkabehtet dahje maid ihkinassii barggažehpet, de dahket visot Ipmila gudnin. 32 Allet vearránahte juvddálaččaid, allet greikalaččaid alletge Ipmila searvegotti. 33 Mun iešnai barggan juohke dáfus dohkket buohkaide; mun in bivdde iežan ávkki, muhto eará olbmuid ávkki, vai sii bestojuvvojit.