Paulusa vuosttaš girji korintalaččaide

Čoaggin Jerusalema kristtalaččaide

¹ Go čoaggibehtet veahki Jerusalema bassi olbmuide, de dahket nugo mun lean gohččon Galatia searvegottiid dahkat. ² Vahku vuosttaš beaivvi iešguhtege dis galgá vurket ruđa sierra dađi mielde go suitá, vai ruhta ii čoggojuvvo easkka dalle go mun lean boahtán diehko. ³ Go mun dasto boađán, de mun vuolggahan olbmuid geaid dii lehpet válljen ja fápmudan, doalvut din attáldaga Jerusalemii. ⁴ Jos orru leamen dárbbašlaš ahte maiddái mun vuolggán, de mii mannat fárrolaga.

Paulusa mátkeáigumušat

⁵ Mun áiggun boahtit din lusa go lean fitnan Makedonias; mun oainnat mátkkoštan Makedonia čađa. ⁶ Muhto mun veaján orrot din lusa muhtun áigái dahje orun velá dálvvige. Dasto dii oažžubehtet ráhkkanahttit mu mátkái, gosa dal vulggežan. ⁷ Mun in dáhto dušše oaidnit din meaddel manadettiinan, muhto sávan beassat orrut din luhtte muhtun áiggi, jos Hearrá suovvá. ⁸ Dáppe Efesosis mun orun hellodagaid rádjái, ⁹ danin go munnje lea rahpasan uksa stuorra ja šattolaš bargui. Vuostálastit leat gal ollu.

¹⁰ Go Timoteus boahtá, de atnet fuola das ahte son beassá leat oadjebas. Dasgo son doaimmaha Hearrá barggu nugo munge, ¹¹  ii oktage oaččo badjelgeahččat su. Veahkehehket su dasto máhccat ráfis. Mun vieljaiguin vuorddán su. ¹² Viellja Apollosa mun lean ávžžuhan sakka vuolgit din lusa oktan eará vieljaiguin, muhto son ii sáhte vuolgit dál; son boahtá go oažžu vuogas áiggi.

Loahppasánit ja dearvvuođat

¹³ Gohcet, bissot nanusin oskkus, lehket jálut ja gievrrat! ¹⁴ Dahket ráhkisvuođas buot maid juo dahkabehtet.

¹⁵ Vieljažiiddán, mus lea didjiide bivdda: Dego diehtibehtet, de Stefanas ja su bearaš leat min barggu álgošaddu Akaias, ja sii leat addán iežaideaset bálvalit bassi olbmuid. ¹⁶ Lehket diige vuolibuččat dakkár olbmuide ja buohkaide geat barget ja rahčet oktan singuin. ¹⁷ Mun lean ilus ahte Stefanas, Fortunatus ja Akaikos leat boahtán deike. Sii leat deavdán din váillaheame ¹⁸ ja leat arvvosmahttán mu ja maiddái din. Atnet árvvus dakkár olbmáid!

¹⁹ Asia searvegottit celket didjiide dearvvuođaid. Akvila ja Priska ja searvegoddi mii čoaggana sudno vissui, celket didjiide váimmolaš dearvvuođaid Hearrá nammii. ²⁰ Buot vieljat celket dearvvuođaid. Dearvvahallet guhtet guoimmádet bassi cummáin.

²¹ Mun, Paulus, čálán dása dearvvuođaid iežan gieđain. ²² Jos muhtun ii ráhkis Hearrá, de son lehkos garuhuvvon. Marana ta! Min Hearrá, boađe! ²³ Hearrá Jesusa árbmu lehkos dinguin. ²⁴ Ráhkis dearvvuođat buot didjiide geat lehpet Kristus Jesusis.