Paulus Ipmila bargoguoibmin
1 Vieljat, mun in sáhttán sárdnut didjiide nugo vuoiŋŋalaš olbmuide, muhto nugo ferte sárdnut daidda geaid sin iežas boares luondu hálddaša, daidda geat Kristusa dovdamis leat ain njuoratmánát. 2 Mun adden didjiide mielkki juhkat, in addán garra borramuša, dasgo dan dii ehpet gierdan. Dii ehpet gierdda dan velá dálge, 3 danne go dis lea ain din boares luondu. Go dis lea gáđašvuohta ja riidu, de dallehan din boares luondu hálddaša din ja dii eallibehtet nugo olbmot juo lávejitge. 4 Go okta dadjá: “Mun lean Paulusa beale”, nubbigis: “Mun lean Apollosa beale”, de almma dii dalle lehpet nugo olbmot juo lávejitge? 5 Mii Apollos lea? Nabai Paulus? Soai leaba bálvaleaddjit geat oahpisteigga din oskut, goappašagat dan doaimmas maid Hearrá lea sudnuide addán. 6 Mun gilven, Apollos láktadii, muhto Ipmil attii šattu. 7 Dan dihte gilvi ii leat mihkkege iige láktadeaddjige, muhto visot lea Ipmila gieđas, son addá šattu. 8 Gilvi ja láktadeaddji leaba ovtta barggus, muhto goappašagat oažžuba bálkká dan mielde maid bargaba. 9 Mii leat Ipmila bargoguoimmit, dii lehpet Ipmila bealdu ja Ipmila viessu.
10 Dan árpmu mielde maid lean ožžon Ipmilis, mun lean dasto čeahpes huksejeaddji láhkái bidjan vuođu man ala muhtun eará hukse. Muhto gehččos juohkehaš, mo hukse. 11 Dasgo ii oktage sáhte bidjat eará vuođu go dan mii lea biddjojuvvon, ja dat lea Jesus Kristus. 12 Jos muhtun hukse dan vuođu ala gollis, silbbas, divrras geđggiin, muoras, suinniin dahje oalggain, 13 de áigi čájeha mo iešguhtege lea huksen. Duopmobeaivi buktá dan albmosii: Dat beaivi almmustuvvá dolas, ja dolla geahččala maid iešguhtege lea olahan dahkat. 14 Dat gean dagut bissot, oažžu bálkká. 15 Dat gean dagut bullet, gillá vahága. Son ieš bestojuvvo, almmatge dego dola čađa.
16 Almma diehtibehtet ahte dii lehpet Ipmila tempel ja ahte Ipmila Vuoigŋa ássá din siste? 17 Jos muhtin bilida Ipmila tempela, de Ipmil dagaha heavu sutnje. Ipmila tempel lea bassi, ja dii lehpet dat tempel.
18 Allos oktage behtto iežas. Jos muhtin dis gáddá iežas viissisin dán máilmmis, son ferte vuos šaddat jallan, vai šaddá viissisin. 19 Dasgo dán máilmmi viisodat lea oainnat jallodat Ipmila čalmmiin. Lea čállojuvvon: Son giellá viisáid sin iežaset gávvilvuhtii, ja vel: 20 Hearrá dovdá viisáid jurdagiid, son diehtá daid duššálažžan. 21 Allos dan dihte oktage rámádallo olbmuin. Dasgo buot gullá didjiide: 22 Paulus, Apollos ja Kefas, máilbmi, eallin ja jápmin, dálážat ja boahttevaččat. Buot dat lea din, 23 muhto dii lehpet Kristusa, ja Kristus lea Ipmila.