Saul ja su bártnit jápmet
1 Filistalaččat soahttájedje Israeliin. Israellaččat báhtaredje sis, ja Gilboavárrái báhce ollu gahččan olbmot. 2 Filistalaččat jokse Saula ja su bártniid ja godde Jonatana, Abinadaba ja Malkišua, Saula bártniid. 3 Soahti šattai garasin Saula birra. Dávgebáhččit áice su, ja son hávváduvai. 4 Dalle Saul dajai vearjoguoddásis: “Rohtte miehki ja rehtte mu dainna, muđui duot birračuohpakeahtes olbmát bohtet ja rehttejit mu ja heahppášuhttet mu.” Muhto go vearjoguoddi ii duostan dahkat dan, danin go son lei hui balus, de Saul ieš rohttii miehkis ja bálkestahtii dasa. 5 Go vearjoguoddi oinnii ahte Saul lei jápmán, de songe bálkestahtii miehkkásis ja jámii oktan suinna. 6 Nu sii buohkat jápme dan beaivvi: Saul, su golbma bártni ja su vearjoguoddi.
7 Go israellaččat geat ásse nuppe bealde jalgadasa ja don bealde Jordana gulle ahte soahteveahka lei báhtaran, ja ahte Saul ja su bártnit ledje jápmán, de sii vulge gávpogiinniset ja báhtaredje, ja filistalaččat bohte ja ásse daidda.
8 Go filistalaččat maŋit beaivvi bohte speadjat gottáhallan olbmuid, de sii gávdne Saula ja su golbma bártni njaŋgámin Gilboaváris. 9 Sii čuhppe sus oaivvi ja válde su vearjjuid, vuolggahedje sáni miehtá filistalaččaid eatnama ja gulahedje vuoitosága eahpeipmiliiddáseaset ja álbmogasaset. 10 Sii bidje Saula vearjjuid Astarte tempelii ja heŋgejedje su rupmaša Bet-Šeana gávpotmuvrii.
11 Go Gileada Jabeša olbmot gulle maid filistalaččat ledje dahkan Saulii, 12 de buot gávpoga vearjoolbmát vulge ja johte geažos ija. Sii válde Saula ja su bártniid rupmašiid Bet-Šeana gávpotmuvrras, bukte daid Jabešii ja bolde daid doppe. 13 Dasto sii válde sin dávttiid ja hávdádedje daid Jabešii tamariskamuora vuollái ja fástudedje čieža beaivvi.