Šlávat ja isidat
1 Buohkat geat bálvalit šlávvan, galget atnit isidiiddiset buot gudnis, vai Ipmila namma ja oahppa ii bilkiduvvo. 2 Šlávat geain leat oskkolaš isidat, eai oaččo atnit sin uhcit gudnis danin go sii leat vieljat. Sii galget baicca bálvalit isidiiddiset velá milloseappot danne go sii leat oskkolaš ja ráhkis vieljat.
Vearreoahppa ja ruhtaváibmilvuohta
3 Buot dán galggat oahpahit ja neavvut. Dat gii oahpaha eará láhkái iige čuovo Hearrámet Jesus Kristusa dearvvaš sániid ja dan oahpa mii gullá min oskui, 4 lea čevlon iige ádde maidege. Son sihtá dušše nákkuid ja digaštallamiid. Dat bohciidahttá gáđašvuođa, bealkku, bilkádusaid, bahás gáttuid 5 ja oktilaš bealkkašemiid daid olbmuid gaskii geat leat jierpmehuvvan ja láhppán duohtavuođa ja atnet ipmilbalu dušše dienasin. 6 Ipmilballu oktan duhtavašvuođain gal leage stuorra vuoitu. 7 Eat mii leat buktán máilbmái maidege eatge sáhte maidege dáppe doalvut. 8 Go mis lea biebmu ja biktasat, de oažžut leat duhtavaččat. 9 Dat geat rikkustuvvet, jorralit geahččalusaide ja gielaide ja eatnat jallas ja vahátlaš anistumiide mat vuodjudit olbmuid heavvaneapmái ja gáđohussii. 10 Ruhtaváibmilvuohta lea buot bahávuođa ruohtas. Háhpohaladettiin ruđaid muhtumat leat čádjádallan eret oskkus ja leat dagahan alcceseaset ollu gillámuša.
Buorre oskku gilvvohallan
11 Muhto don, Ipmila olmmoš, báhtar buot diein! Váinnut vanhurskkisvuođa, ipmilbalu, oskku, ráhkisvuođa, gierdavašvuođa ja láđisvuođa. 12 Soađa oskku buori soađi ja vuoitte alccesat agálaš eallima masa leat rávkojuvvon ja maid leat dovddastan iežat mearrin, go eatnat duođašteddjiid gullut celket buori dovddastusa. 13 Ipmil, buot eallima ája, ja Kristus Jesus guhte Pontius Pilatusa ovddas duođaštii buori dovddastusa, leat mu duođašteaddjit go mun gohčun du: 14 Doala dán barggu duolvvakeahttájin ja láitemeahttumin gitta dassážii go min Hearrá Jesus Kristus almmustuvvá. 15 Go áigi dievvá, de dan diktá min oaidnit
ávdugas ja áidna ráđđejeaddji,
gonagasaid gonagas ja hearráid Hearrá.
16 Son okto lea jápmemeahttun,
son ássá čuovgasis gosa ii oktage sáhte lahkanit.
Su ii oktage olmmoš leat oaidnán
iige sáhte oaidnit.
Su lea gudni ja agálaš fápmu. Amen.
Buriid daguid riggodat
17 Várre daid geat leat riggát dán máilmmis, čeavlástallamis ja bidjamis doaivvu vissismeahttun riggodahkii, muhto baicca Ipmilii guhte addá midjiide valjis buot maid mii dárbbašit. 18 Rávve sin dahkat buriid, čoaggit riggodahkan buriid daguid ja juogadit árvasit earáide dan mii sis lea. 19 Dan láhkái sii čohkkejit alcceseaset dávvira, buori vuođđudusa boahtteáiggi várás, vai vuitet alcceseaset duohta eallima.
20 Timoteus, várjal dan mii dutnje lea oskkilduvvon! Duostto ipmilmeahttun ja joavdelas ságaid ja nákkáhallamiid maid hutká diehtun gohčoduvvon boasttodiehtu. 21 Muhtun olbmot leat riepman dan dovddasteaddjin ja leat čádjidan eret oskkus.
Árbmu didjiide buohkaide!