Paulusa nubbi girji korintalaččaide

¹ Ipmila bargoguoibmin mii neavvut din amadet duššás váldit vuostá Ipmila árpmu. ² Dasgo son cealká: Mun gullen du rohkosa rivttes áigái ja veahkehin du bestojumi beaivvi. Aiddo dál lea vuogas áigi, aiddo dál lea bestojumi beaivi.

Gierdavašvuohta bálvalusas

³ Mii eat áiggo vearránahttit olbmuid mange dáfus, amas min bálvalus láitojuvvot. ⁴ Juohke láhkái mii čájehit iežamet Ipmila bálvaleaddjin: Mii gierdat sitkadit váttisvuođaid, heđiid ja áŧestusaid, ⁵ spihččemiid, fáŋgavuođaid, stuimmiid, rahčamušaid, idjagohcimiid ja fástudemiid. ⁶ Min miella lea buhtis, mis lea diehtu, gierdavašvuohta ja ustitlašvuohta, mis lea Bassi Vuoigŋa, duohta ráhkisvuohta, ⁷ duohtavuođa sátni ja Ipmila fápmu, mis lea vearjun vanhurskkisvuođa galba ja miehkki. ⁸ Mii gudnejahttojuvvot ja fudnojuvvot, mis lea heajos beaggin ja mii rámiduvvot. Mii adnojuvvot fillejeaddjin, vaikko mii sárdnut duođa. ⁹ Mii leat dovdameahttumat, muhto almmatge measta menddo oahppásat. Mii leat lahka jápmima, muhto eallit, illastuvvon eatge dattetge goddojuvvon, ¹⁰  morašlaččat, muhto álo ilus. Mii leat geafit, muhto riggudahttit eatnagiid; mis ii leat mihkkege, muhto mii oamastit dattetge buot.

¹¹ Mii leat sárdnon didjiide rahpasit, korintalaččat, min váibmu lea luomus, ¹² das lea didjiide sadji, muhto din váibmu lea gárži. ¹³ Bálkkašehket min – mun sártnun nugo mánáidasan – lehket maiddái dii rahpasat!

Ealli Ipmila tempel

¹⁴ Allet searvva eahpeoskkolaččaiguin seammá geassá vuollái. Maid searvevuođaid vanhurskkisvuohta atná lágahisvuođain, maid čuovggas seavdnjadasain? ¹⁵ Mo Kristus ja Beliar sáhttiba leat ovtta oaivilis? Mii ovttastahttá oskkolačča eahpeoskkolaččain? ¹⁶ Mo eahpeipmilat sohpet Ipmila tempelii? Miihan leat ealli Ipmila tempel, nugo Ipmil lea cealkán: Mun ásan sin gaskii ja vádjolan singuin; mun lean sin Ipmil, ja sii leat mu álbmot. ¹⁷ Danne Hearrá cealká: Vulget eret sin searvvis ja sierranehket sis, allet guoskkat maidege buhtismeahttumiid. Dalle mun válddán din vuostá ¹⁸ ja lean din áhčči, ja dii lehpet mu bártnit ja nieiddat, cealká Hearrá, Buotveagalaš.