Lágahisvuođa olmmoš ja Jesusa boahtin
1 Mii váldit dál sáhkan Hearrámet Jesus Kristusa boahtima ja dan go mii čoggojuvvot su lusa. Vieljažiiddán, mii bivdit: 2 Allet dallánaga mášohuva alletge suorgan, jos muhtun čujuha Vuoiŋŋa almmuhussii dahje mahkáš min sárdnái dahje girjái ja čuoččuha ahte Hearrá beaivi lea juo boahtán. 3 Allet divtte ovttage fillet iežadet mange láhkái. Dasgo oskkus jorraleapmi ferte vuos dáhpáhuvvat ja lágahisvuođa olmmoš almmustuvvat, gáđohusa bárdni, 4 vuostálasti, gii alida iežas buot dan badjel mii gohčoduvvo ipmilin ja bassin, čohkána ieš Ipmila tempelii ja gulaha leat Ipmil. 5 Almma muitibehtet ahte mun dadjen dán didjiide juo dalle go ledjen din luhtte? 6 Dii diehtibehtet mii su dál caggá, nu ahte son almmustuvvá easkka dalle go su áigi boahtá.
7 Lágahisvuođa čiegus váikkuhus lea juo duddjomin. Dat mii ain dan caggá, ferte goit vuos jávkaduvvot; 8 dalle almmustuvvá lágahisvuođa olmmoš gean Hearrá Jesus goddá njálmmi vuoiŋŋanasain ja duššada iežas boahtima hearvásvuođain. 9 Lágahisvuođa olmmoš boahtá Sáhtána fámuin ja dahká behtolaš mearkkaid ja oavdduid. 10 Su vearrivuohta fille daid geat mannet gáđohussii, danne go sii eai dáhtton ráhkistit duohtavuođa mii livččii sin beastán. 11 Danne Ipmil vuolggaha veagalaš čádjádusa, vai sii jáhkket giellásii, 12 ja nu dubmejuvvojit buohkat geat eai leat oskon duohtavuhtii, muhto leat válljen vearrivuođa.
Bissot das maid lehpet oahppan
13 Muhto dii vieljažiiddán geaid Hearrá ráhkista, din dihte mii leat álelassii geatnegasat giitit Ipmila. Ipmil lea válljen din álgošaddun daid gaskkas geat bestojuvvojit, go Vuoigŋa basuha din ja dii oskubehtet duohtavuhtii. 14 Aiddo dása, Jesus Kristusa hearvásvuođa oamasteapmái, son rávkkai din, go mii buvttiimet didjiide evangeliuma. 15 Bissot dan dihte nanusin, vieljažiiddán, ja dollet čavga gitta dain oahpahusain maid mii leat addán didjiide njálmmálaččat dahje girjjis. 16 Hearrámet Jesus Kristus ieš ja Ipmil, min Áhčči, gii lea ráhkistan min ja lea árpmustis addán midjiide agálaš jeđđehusa ja buori doaivvu, 17 jeđđejehkos din váimmu, vai dii álo veadjibehtet sárdnut ja dahkat dan mii lea buorre.