1 Gullet dán, dii Bašana gusat
geat ássabehtet Samaria váris!
Dii soardibehtet gefiid
ja duolbmabehtet váivvášiid.
Dii dadjabehtet boatnjáidasadet:
“Buvtte juhkamuša!”
2 Hearrá Ipmil lea vurdnon
bassivuođas bokte:
Didjiide boahtá beaivi
goas dii gessojuvvobehtet eret rohkiiguin,
din maŋimuš bázahas áŋkoriiguin.
3 Dii buohkat šaddabehtet
mannat olggos muvraráhkanráigge,
dii áddjojuvvobehtet Hermona guvlui,
cealká Hearrá.
Ráhkkan gávnnadit Ipmiliinnat
4 Mannet Betelii ja suddudehket,
mannet Gilgalii ja suddudehket
vel eambbo!
Buktet oaffariiddádet iđedis,
logádasaideattet basiid goalmmát beaivvi!
5 Boldet suvruduvvon láibbi giittusoaffarin,
gulahehket jitnosit eaktodáhtolaš
attáldagaideattet!
Nuhan dii dáhttubehtet, israellaččat,
cealká Hearrá Ipmil.
6 Mun dikten din vázzit guoros čovjjiid
buot gávpogiinnádet,
juohke sajis almmá láibbi haga.
Muhto dii ehpet máhccan mu lusa,
cealká Hearrá.
7 Mun doalahin dis arvvi
go ain ledje golbma mánu ládjui.
Mun dikten arvit ovtta gávpogii,
nubbáigis in.
Okta eananbihttá oaččui arvvi,
muhto nubbi mii ii ožžon, goikkai.
8 Guovtti, golmma gávpogis olbmot suibo
ovttahat gávpogii juhkat čázi,
muhto eai almmatge čáskadan goikku.
Muhto dii ehpet máhccan mu lusa,
cealká Hearrá.
9 Mun časken guorbamiin
ja ástamiin din gortni,
mun goikadin din gilvvagárddiid
ja viidnegárddiid,
ja rásselohkut borre din
fiikonmuoraid ja oliivamuoraid.
Muhto dii ehpet máhccan mu lusa,
cealká Hearrá.
10 Mun vuolggahin din vuostá
rohttudávdda
nugo mun vuolggahin dan Egypta vuostá,
mun godden din nuorra olbmáid mihkiin
ja adden din heasttaid soahtesálašin.
Mun dikten din soahtesiidda
liikahája badjánit din iežadet njunnái.
Muhto dii ehpet máhccan mu lusa,
cealká Hearrá.
11 Mun vuolggahin didjiide
heavu dego dalle go Sodoma ja Gomorra
heavahuvvojedje,
dii leiddet dego dolas rohttejuvvon ráddi.
Muhto dii ehpet máhccan mu lusa,
cealká Hearrá.
12 Dan dihte, Israel,
mun divttán garuhusa deaivat dutnje.
Ja danin go mun dagan dan dutnje,
de ráhkkan, Israel, gávnnadit Ipmiliinnát!
13 Geahča,
son lea hábmen váriid ja sivdnidan biekka.
Son almmuha olbmui áigumušaidis.
Son dahká seavdnjada iđitroađđin
ja manná eatnama alážiid badjel.
Hearrá, Almmiveagaid Ipmil, lea su namma.