Njealját oainnáhus
1 Hearrá Ipmil oainnihii munnje dán oainnáhusa: Lei veaddelihti man dievva ledje láddan šaddosat. 2 Son jearai: “Amos, maid don oainnát?” Mun vástidin: “Veaddelihti man dievva leat láddan šaddosat.” Hearrá celkkii munnje:
“Mu álbmot Israel lea láddan
ja gahččá fargga,
mun in dáhto šat árkkálmastit dan.
3 Dan beaivvi šloahta lávlu nissonat
fuoikugohtet,
cealká Hearrá Ipmil.
Eatnat rupmašat,
juohke sadjái bálkestuvvon.
Jaska!”
Hearrá dubme behtolaš gávppašeami
4 Gullet dán, dii geat
duolbmabehtet váivvášiid
ja loahpahehpet eatnama vártnuhemiid!
5 Dii dadjabehtet: “Goas nohká
mánočalbmebeaivvi ávvudeapmi,
vai beassat vuovdit gortni,
ja sabbat, vai beassat rahpat gordnebuvdda?
Dalle mii dahkat mihtu vádjegin,
bajidit hatti ja atnit vearreveavtta.
6 Dalle mii oastit váivvášiid ruđain
ja geafes rávkki gámabárain.
Gordnesuohpahasaidge
mii vuovdit gordnin!”
7 Hearrá lea vurdnon
Jakoba čeavlli bokte:
Mun in goassege vajáldahte
maid sii leat dahkan.
8 Iigo eanan doarggistivčče dan dihte,
eaigo buohkat geat ássit das moraštivčče?
Iigo oppa eanan dulvvaše dego Nileatnu,
badjánivčče ja cogoše nugo Egypta eatnu?
9 Dan beaivvi, cealká Hearrá Ipmil,
mun divttán beaivváža
luoitádit gaskabeaivvi
ja sevnnjodahtán eatnama
go ain lea čuvges beaivi.
10 Din basiid mun jorgalan morašin
ja buot din lávlagiid morašlávllan,
čanan horstta buohkaid alimiid birra
ja divttán juohkehačča oaivvi
ráhkejuvvot báljisin
nugo dalle go lea moraš áidna bártni dihte,
ja dagan dan loahpa bahča beaivin.
11 Duođaid, beaivvit bohtet,
cealká Hearrá Ipmil,
goas mun vuolggahan eatnamii nealggi,
in láibenealggi inge čáhcegoikku,
muhto Hearrá sáni gullama nealggi.
12 Dalle olbmot vádjolit ábis áhpái,
johtalit davvin nuorttas
ja ohcet Hearrá sáni,
muhto eai gávnna.
13 Dan beaivvi čáppa nieiddat
ja nuorra olbmát vuoimmehuvvet
goikku geažil,
14 dat geat vurdnot
Samaria suttu bokte ja dadjet:
“Nu duohta go du ipmil eallá, Dan!”
ja: “Nu duohta go du ipmil eallá, Beer Šeba!”
Sii gahččet eaige šat čuožžil.