Viđát Mosesgirji

Iešguđetlágán mearrádusat

¹ Jos oainnát vieljat vuovssá dahje sávzza čádjádaddamin, de ale divtte ášši báhcit daninassii, muhto máhcat oami vielljasat. ² Jos son ássá guhkkin dahje jos it dieđe gean oapmi dat lea, de váldde dan mielddát ja doala dan dassážii go du viellja boahtá ohcat dan, ja atte dalle dan sutnje. ³ Daga seammá láhkái, jos muhtun lea láhppán iežas ásena, gárvvu dahje maid beare mii gullá sutnje; jos gávnnat juoidá mii gullá nubbái, de galggat máhcahit dan. ⁴ Jos oainnát ahte du vielja ásen dahje vuoksá lea gahččan bálgái ja beasadallá das, de ale mana meaddel, muhto veahket vieljat čuoččáldahttit ealli.

⁵ Nisson ii oaččo atnit dievddu gárvvuid iige dievdu oaččo gárvodit nissona biktasiid, danne go Hearrá, din Ipmil, fasttáša buohkaid geat dahket nu.

⁶ Jos don vádjolettiin gávnnat muoras dahje eatnamis lottibeasi mas leat čivggat dahje monit, ja eatni daid lállimin, de it oaččo váldit eatni oktan čivggaiguin. ⁷ Divtte eatni girdilit ja váldde dušše čivggaid. Dalle dutnje geavvá bures, ja don oaččut eallit guhká.

⁸ Go don hukset ođđa viesu, de cegge dáhki birra giehtaáiddi, amat dagahit vissui varravealggi, jos muhtun ravgá dáhkis.

⁹ Ale šaddat viidnegárddistat eará šattuid, vai viidnemuoraid šaddu ja eará šaddu eai mana bassibáikái. ¹⁰ Ale geassas vuovssá ja ásena ovttahat ploga ovdii. ¹¹ Ale gárvot biktasa mii lea gođđojuvvon guovttelágán láiggis, ullus ja beallemasas.

¹² Daga dihpiid iežat oalgebiktasa njealji čihkii.

Láhka sohkabealgaskavuođaid birra

¹³ Jos olmmái lea váldán áhká ja veallán suinna, muhto de oažžu sutnje vuostemiela ¹⁴ ja sivahallá su ja dagaha sutnje heajos beaggima ja dadjá: “Mun válden dán nissona áhkkán, muhto go mun veallájin suinna, de mun gávnnahin ahte son ii lean eadneviđá”, ¹⁵ de nieidda áhčči ja eadni galgaba mannat gávpoga vuorrasiid lusa gávpotportii ja váldit mielde duođaštusa das ahte nieida lei eadneviđá. ¹⁶ Nieidda áhčči galgá dadjat vuorrasiidda: “Mun adden iežan nieidda áhkkán dán olbmái, muhto son lea ožžon sutnje vuostemiela ¹⁷ ja soaibmá dál su das ahte nieida ii lean eadneviđá. Muhto dá lea su nieidavuođa mearka.” De soai galgaba lebbet liinni gávpoga vuorrasiid ovdii, ¹⁸ ja vuorrasat galget ráŋggáštit olbmá ¹⁹ ja sáhkohit su čuđiin silbbašekeliin ja addit ruđaid nieidda áhččái, danin go olmmái lea dagahan heajos beaggima israellaš niidii. Nieida bissu dan olbmá áhkkán, iige olmmái oaččo earránit sus nu guhká go eallá. ²⁰ Muhto jos čuoččuhus lea duohta iige nieidavuođa mearka gávdno, ²¹ de vuorrasat galget doalvut nieidda áhčis viesu uksaráiggi ovdii, ja gávpoga olbmát galget geađgádit su jámas; sonhan lei dahkan heahpatlaš dagu Israelis go lea furrošan áhčis viesus. Duššadehket bahá álbmoga gaskkas.

²² Jos olmmái fáhtejuvvo veallámin nuppi olbmá áhkáin, de goappašagat galgaba jápmit, sihke nisson ja olmmái gii veallái suinna. Duššadehket bahá Israelis.

²³ Jos olmmái veallá eadneviđá nieiddain gii lea lohpádaddan nuppiin olbmáin, ja dat dáhpáhuvvá gávpogis, ²⁴ de dii galgabehtet doalvut sudno goappašagaid gávpotportii ja geađgádit jámas; nieidda danin go son ii čurvon veahki, ja olbmá danin go son heahppášuhtii lagamuččas nissona. Duššadehket bahá álbmoga gaskkas. ²⁵ Jos olmmái deaivá meahcis nieidda gii lea lohpádaddan nuppiin, dohppe su ja veallá suinna, de dušše olmmái galgá jápmit. ²⁶ Niidii don it oaččo dahkat maidege, danin go nieida ii leat dahkan suttu mii ánssášivččii jápmima. Dat lea seammalágán ášši go jos olmmái falleha nuppi ja goddá su. ²⁷ Olmmáihan deaivvai meahcis nieidda gii lei lohpádaddan, ja nieida čuorvvui veahki, muhto ii oktage boahtán gádjut su.

²⁸ Jos olmmái deaivá eadneviđá nieidda gii ii leat lohpádaddan, dohppe su ja veallá suinna, ja soai gávnnahallaba, ²⁹ de olmmái gii veallái nieiddain galgá addit nieidda áhččái vihttalogi šekela silbba. De son galgá váldit nieidda áhkkán danin go lea veallán suinna, iige son oaččo earránit áhkástis nu guhká go eallá.

³⁰ Olmmái ii oaččo váldit áhkkán áhčis áhká, muđui son heahppášuhttá áhčis oađđinsaji.