Bassi álbmoga buhtisvuohta
1 Ii oktage geas vuolleváimmut leat cuvkejuvvon dahje geas buohča lea čuhppojuvvon, beasa Hearrá searvegoddái. 2 Ii oktage seahkenálat olmmoš beasa Hearrá searvegoddái; su mánná ii velá logát buolvvasge beasa Hearrá searvegoddái. 3 Ii oktage ammonlaš dahje moablaš beasa Hearrá searvegoddái; sin mánát eai velá logát buolvvasge beasa Hearrá searvegoddái. 4 Siihan eai buktán didjiide láibbi ja čázi go leiddet boahtimin Egyptas, ja sii bálkáhedje Bileama, Beora bártni, gii lei eret Petoris Aram Naharajimis, garuhit din. 5 Muhto Hearrá, din Ipmil, ii dáhtton gullat Bileama, muhto jorgalii garuhusa buressivdnádussan, danin go son ráhkista din. 6 Nu guhká go eallibehtet, de allet goassege ovddit sin lihku ja birgejumi.
7 Allet fasttáš edomlaččaid; siihan leat din vieljat. Allet fasttáš egyptalaččaid, danne go dii ásaidet vierisin sin eatnamis. 8 Sin mánát goalmmát buolvvas besset Hearrá searvegoddái.
9 Go vuolgibehtet soahtat vašálaččaideattetguin, de váruhehket buot vearránusain. 10 Jos olmmái lea šaddan buhtismeahttumin danin go su siepman lea golgan ihkku, de son galgá mannat siidda olggobeallái ja orrut doppe. 11 Eahkedis son galgá basadit, ja beaivváža luoitádettiin son oažžu máhccat siidii.
12 Dis galgá leat vissis báiki siidda olggobealde gosa mannat gálgat earániid. 13 Dis galgá leat boahkánis unna goaivu mainna roggabehtet rokki ja gokčabehtet earániiddádet.
14 Hearrá, din Ipmil, vádjola din siiddas, várjala din ja addá din vašálaččaid din gihtii. Dan dihte din siida galgá leat bassi, nu ahte son ii oainne doppe maidege nuskkiid iige jorgal dis eret.
15 Allet máhcat šláva gii lea báhtaran isidisttis ja dorvvastan didjiide. 16 Diktet su orrut din luhtte ja ássat dan gávpogii maid ieš vállje. Allet soardde su.
17 Ii oktage israellaš nisson iige olmmái oaččo leat tempelfuorrá. 18 Dii ehpet oaččo buktit mange lohpádusa deavdima várás Hearrá, Ipmileattet, vissui fuorrábálkká, leaš dat dal máksojuvvon nissonii dahje divdui, danne go Hearrá, din Ipmil, fasttáša dan.
Mearrádusat reanttuid ja lohpádusaid birra
19 Allet váldde reanttu vieljasteattet, allet ruđas, borramušas alletge mastege maid sáhttá lonet reanttu vuostá. 20 Olgoeatnama olbmos dii oažžubehtet váldit reanttu, muhto ehpet vieljasteattet. Dalle Hearrá, din Ipmil, buressivdnida din buot das maid dahkabehtet dan eatnamis maid dál mannabehtet váldit oapmineattet.
21 Go dagat lohpádusa Hearrái, Ipmilasat, de ale ájahala deavdimis dan, muđui Hearrá, du Ipmil, bidjá du vástidit das maid leat lohpidan, ja don geasát badjelasat suttu. 22 Jos don it daga lohpádusa, de it suddut. 23 Muhto jos don eaktodáhtos leat njálmmálaččat lohpidan juoidá Hearrái, Ipmilasat, de galggat deavdit dan oskkáldasat.
24 Go don boađát nuppi olbmo viidnegárdái, de oaččut borrat viidnemurjjiid nu ollu go hálidat, muhto it oaččo čoaggit daid gorii. 25 Go don boađát nuppi olbmo gordnebeldui, de oaččut doadjit gordneoivviid gieđain, muhto sirppiin it oaččo čuohppat gordneoivviid su bealddus.