1 Muitte sivdnideaddját dan botta go leat nuorra,
ovdal go bohtet bahás beaivvit,
ja jovdet dat jagit
mat eai leat dutnje illun,
2 ovdal go beaivváščuovga, mánnu
ja násttit sevnnjodit
ja arvvi maŋŋil bohtet ain ođđa balvvat.
3 Dalle viesu gáhttejeaddjit doarggistit,
fámolaš olbmát guokkagit,
millejeaddji nissonat vuoiŋŋadit
dainna go leat šaddan hárvin,
ja seavdnjadas joksá daid
geat guvlet lásiid ráigge,
4 gáhtabeali uvssat dahppojuvvojit,
millu jietna vuollu
ja badjána dušše cizášjiena muddui
ja buot lávlaga skájat jaskkodit.
5 Dalle olmmoš ballá juohke luohkás
ja geainnu balddonasain.
Mandelmuorra lieđđu
ja rásselohkku njoammu ovdan
ja kapersčuolmmat álmmehuvvet,
muhto olmmoš manná agálaš vissosis
ja morašteaddjit leat juo gáhta alde.
6 Muitte sivdnideaddját ovdal go silbabáddi boatkana
ja gollelihtti ráhká,
ovdal go ruhkku cuovkana ájagáttis
ja gáivojorri luoddana ja gahččá gáivui.
7 Muolda jorrá eanamin mii dat lei,
ja vuoigŋa máhccá Ipmila lusa gii dan attii.
8 Duššálašvuođaid duššálašvuohta,
dajai Sárdnideaddji,
buot lea duššálašvuohta.
Loahppasánit
9 Sárdnideaddji lei viissis ja son maid oahpahii dieđu álbmogii. Son suokkardii ja guorahalai, ja son hábmii eatnat sátnevádjasiid. 10 Sárdnideaddji bivddii gávdnat vuogas dajaldagaid ja čálii njuolga duohtavuođa sániid. 11 Viisáid sánit leat dego biikasoappit, čohkkejuvvon viissisvuođa sánit dego bures giddejuvvon návllit. Dat bohtet ovtta ja seammá báimmanis.
12 Ja de vel, bártnážan, gula dán várrehusa:
Eatnat girjjiid dahkamis
ii leat mihkkege loahpaid,
ja ollu guorahallan vuoimmehuhttá rupmaša.
13 Dát lea loahppaboađus buot das maid leat gullan: Bala Ipmilis ja doala su báhkkomiid. Dan juohke olmmoš ferte dahkat. 14 Ipmil bidjá olbmo vástidit juohke dagus, maiddái buot dain mat leat čihkkojuvvon, lehkoset buorit dahje bahát.