Morašlávlla farao birra
1 Guoktenuppelogát jagi guoktenuppelogát mánus, mánu vuosttaš beaivvi munnje bođii dát Hearrá sátni: 2 Olmmoš, lávllo morašlávlaga farao, Egypta gonagasa, birra:
Álbmogiid ledjon,
don leat duššaduvvon!
Don ledjet dego ábi guovdi,
don stuhčet jogainat,
moivejit čázi julggiidatguin
ja firrot jogaid mođiid.
3 Ná cealká Hearrá Ipmil:
Mun suhppen fierbmán du badjelii,
eatnat álbmogat bivdet du
mu firpmiin.
4 Mun suhppen du gáddái,
bálkestan du báljes eatnamii.
Mun divttán buot almmi lottiid
seaivut du ala
ja gallehan buot eatnama spiriid
duinna.
5 Mun suhppen du goruda váriide,
deavddán legiid du ráppiin.
6 Mun laskadan eatnama
varain mii dus golgá,
du varra deavdá jogažiid.
7 Go mun čáskadan du heakka,
de mun govččan almmi
ja sevnnjodahtán dan násttiid.
Mun govččan beaivváža balvvaiguin,
mánnu ii šat báitte.
8 Buot almmi báiti čuovggaid
mun sevnnjodahtán du dihte.
Mun govččan du eatnama
seavdnjatvuođain,
cealká Hearrá Ipmil.
9 Mun muosehuhtán eatnat álbmogiid go gulahan daid gaskii du heavvaneami, miehtá eatnamiid maid don it dovdda. 10 Mun suorggahan du vurbbiin ollu álbmogiid, ja sin gonagasat doarggistit balus go sii oidnet mu likšamin miehki. Go don gahčat, de sii buohkat dohppehallet oktilaš ballui heakkaset dihte.
11 Ná cealká Hearrá Ipmil: Babylona gonagasa miehkki falleha du. 12 Mun divttán du šlámaideaddji joavkku gahččat soahteolbmáid, goaves báhkiniid, miehkkái. Sii duššadit Egypta goargatvuođa, oppa dan šlámaideaddji joavku duššaduvvo. 13 Mun duššadan buot omiid dan eatnogáttiin. Dan čáziid eai moive šat olbmuid juolggit eaige omiid gaccat, 14 muhto čáhci golgá buhtisin, šealgadin dego olju, cealká Hearrá Ipmil. 15 Mun dagan Egypta meahccin, ávdimin ja olbmoheapmin, mun gottán buohkaid geat ásset doppe. Dalle sii ipmirdit ahte mun lean Hearrá.
16 Dát lea morašlávlla, ja morašlávllan dan galgá lávlut. Buot álbmogiid nissonat galget lávlut dan, sii galget lávlut dan Egyptii ja oppa dan šlámaideaddji jovkui, cealká Hearrá Ipmil.
Morašlávlla Egyptii ja eará riikkaide
17 Guoktenuppelogát jagi vuosttaš mánus, mánu vihttanuppelogát beaivvi munnje bođii dát Hearrá sátni: 18 Olmmoš, váidde Egypta šlámaideaddji joavkku ja dan allanálat olbmáid, váidde, don ja buot álbmogiid nissonat:
Čiekŋalasa eatnamii mun nordadan sin,
daid lusa geat leat mannan hávdái.
19 Leigo du hearvásvuohta
stuorit go earáid?
Njieja, mana vuoiŋŋadit
birračuohpakeahtes olbmuid gaskii!
20 Egyptalaččat jovdet
mihkiin sorbmejuvvon olbmuid bárrii,
seaŋga lea gárvvis Egyptii
ja oppa dan šlámaideaddji jovkui.
21 Stuorimus sáŋgárat sárdnot
jábmiidáimmus faraoi
ja su veahkeheddjiide:
Birračuohpakeahtes olbmot
leat njiedjan ja boahtán vuoiŋŋadit,
dat geat leat goddojuvvon mihkiin.
22 Doppe lea Assur,
ja oppa su soahteveahka
lea hávddiin su birra.
Buohkat leat goddojuvvon,
gahččan miehkkái.
23 Sii ožžo hávddi vuolimus rokkis,
Assura hávddi birra njaŋgá
oppa su soahteveahka.
Buohkat leat goddojuvvon,
gahččan miehkkái,
dat geat gilve balu
ealli olbmuid eatnamis.
24 Doppe veallá Elam,
ja su hávddi birra njaŋgá
oppa su šlámaideaddji joavku.
Buohkat leat goddojuvvon,
gahččan miehkkái.
Birračuohpakeahttájin sii njidje
čiekŋalasa eatnamii,
dat geat gilve balu
ealli olbmuid eatnamis.
Dál sin oassin lea seammá heahpat
go dain geat leat mannan hávdái.
25 Goddojuvvon olbmuid gaskii
oaččui Elam seaŋgga,
ja oppa su šlámaideaddji joavku
lea hávddiin su birra.
Buohkat leat birračuohpakeahtes olbmot,
goddojuvvon mihkiin.
Oktii sii gilve balu
ealli olbmuid eatnamis.
Dál sin oassin lea seammá heahpat
go dain geat leat mannan hávdái.
Goddojuvvon olbmuid gaskkas
lea sin sadji.
26 Doppe njaŋgájit Mešek ja Tubal
ja sin šlámaideaddji joavku
hávddiin sin birra.
Buohkat leat birračuohpakeahtes olbmot,
goddojuvvon mihkiin.
Oktii sii gilve balu
ealli olbmuid eatnamis.
27 Sii eai njaŋgá daid sáŋgáriid gaskkas
geat gahčče dolin,
daid geat njidje jábmiidáibmui
oktan soahtevearjjuideasetguin,
ja dál vuoiŋŋadit miehkki oaivvi vuolde
ja galba dávttiid alde.
Oktii sáŋgárat gilve balu
ealli olbmuid eatnamis.
28 Don cuvkejuvvot oktan birračuohpakeahtes olbmuiguin ja njaŋgát daid gaskkas geat leat goddojuvvon mihkiin.
29 Doppe njaŋgá Edom ja gonagasat ja oaivámuččat geat ledje fámolaččat, muhto dattetge gárte daid gaskii geat ledje goddojuvvon mihkiin. Dál sii veallájit ovttas birračuohpakeahtes olbmuiguin ja daiguin geat leat mannan hávdái. 30 Doppe njaŋgájit buot davvieatnama oaivámuččat ja buot sidonlaččat. Vaikko sii gilve balu, sii gárte mannat vulos goddojuvvon olbmuid gaskii. Sin givrodat jorai heahpadin. Birračuohpakeahttájin sii njaŋgájit daid gaskkas geat leat goddojuvvon mihkiin. Dál sin oassin lea seammá heahpat go dain geat leat mannan hávdái.
31 Farao oaidná daid buohkaid ja jeađđašuvvá morrašisttis šlámaideaddji joavkkus dihte. Farao ja oppa su soahteveahka leat goddojuvvon mihkiin, cealká Hearrá Ipmil. 32 Mun dikten su gilvit balu ealli olbmuid eatnamis. Dál son biddjojuvvo birračuohpakeahtes olbmuid gaskii, farao ja oppa su šlámaideaddji joavku, cealká Hearrá Ipmil.