Goga duopmu
1 Olmmoš, gulat Gogii duomu. Daja: Ná cealká Hearrá Ipmil: Mun fallehan du, Gog, Mešeka ja Tubala stuorraoaivámuš! 2 Mun geasán du báikkis nubbái, mun johttáhan du guhkkin davvin ja buvttán du Israela váriide. 3 Doppe mun časkkán dávggi du gurut gieđas ja fađustan njuolaid du olgeš gieđas. 4 Don gahčat Israela váriide, don ja buot du soahtejoavkkut ja álbmogat mat leat du mielde. Mun attán du buotlágán gazzalottiid ja meahcispiriid biebmun. 5 Don bázát njaŋgát báljes eatnamii, nu mun lean mearridan, cealká Hearrá Ipmil.
6 Mun vuolggahan dola Magoga eatnamii ja cahkkehan daid álbmogiid eatnamiid mat ásset mearrarittus. Dalle duot álbmogat mat gádde ássat oadjebassan, ipmirdit ahte mun lean Hearrá. 7 Álbmogasan Israelii mun dovddahan iežan bassi nama, in mun šat suova iežan nama heahppášuhttojuvvot. Dalle buot álbmogat ipmirdit ahte mun lean Hearrá, Israela bassi. 8 Dat beaivi boahtá, cealká Hearrá Ipmil, nu dáhpáhuvvá. Dat beaivi maid mun lean almmuhan, boahtá. 9 Israela gávpogiid ássit vulget olggos gávpogiin, cahkkehit dola ja boldet vearjjuid, jorba galbbaid ja guhkes galbbaid, dávggiid ja njuolaid, bállahastinsáittiid ja guhkes sáittiid. Čieža jagi sii atnet daid boaldámuššan. 10 Sii eai dárbbaš viežžat rissiid meahcis eaige njeaidit muoraid vuovddis, muhto sii baicce atnet vearjjuid boaldámuššan. Sii rievidit rievideddjiideaset ja spedjet daid geat spedje sin, cealká Hearrá Ipmil.
11 Dan beaivvi mun attán Gogii hávdesaji Israelis, Obrimleagis, mii lea mearas nuorttas iige leat manahahtti mátkkálaččaide. Dohko hávdáduvvo Gog ja oppa su šlámaideaddji joavku, ja dat leahki gohčoduvvo das maŋŋil Goga joavkku leahkin. 12 Čieža mánu israellaččat hávdádit sin ja buhtistit eatnama. 13 Buot eatnama olbmot hávdádit sin, ja dat šaddá sidjiide gudnin dan beaivvi go mun čájehan iežan fámu, cealká Hearrá Ipmil. 14 Čieža mánu geažes sii válljejit olbmáid johtit miehtá eatnama ja hávdádit daid mat ain leat báhcán hávdátkeahttá, vai eanan šaddá buhtisin. 15 Go muhtin dain olbmáin áicá olbmodávttiid go lea johtimin eatnamis, de son galgá cegget mearkka daid gurrii, vai hávdádeaddjit dihtet hávdádit daid Goga joavkku leahkái. 16 Muhtin gávpoga nammage lea Hamona. Nu sii buhtistit eatnama.
17 Olmmoš, ná cealká Hearrá Ipmil: Daja buot lottiide ja buot meahcielliide: Čoahkkanehket, bohtet! Bohtet juohke guovllus mu oaffarmállásiidda, stuorra oaffarmállásiidda maid mun lágidan didjiide Israela váriide. Dii beassabehtet borrat oačči ja juhkat vara. 18 Borret gievrraid oačči, juhket eatnama oaivámuččaid vara – vierccaid, lábbáid, bohkáid, Bašana buoiduduvvon vuovssáid! 19 Borret oaffarmállásiid maid mun lean lágidan didjiide, borret buoiddi gallás ja juhket vara dassá go gárihuvvabehtet. 20 Mu beavddis dii beassabehtet borrat gallás riidenheasttaid ja vovdnaheasttaid, soahteolbmáid ja gievrraid, cealká Hearrá Ipmil.
21 Mun almmustahtán iežan fámu buot álbmogiidda, dat oidnet mo mun ollašuhtán duomuidan ja lokten gieđa sin vuostá. 22 Dan beaivvi rájes israellaččat ipmirdit ahte mun, Hearrá, lean sin Ipmil.
23 Buot álbmogat ipmirdit ahte israellaččat dolvojuvvojedje eret dan dihte go sii ledje oskkáldasmeahttumat ja suddudedje mu vuostá. Mun čihken sis muođuidan ja adden sin sin vašálaččaid gihtii, nu ahte sii buohkat gahčče miehkkái. 24 Mun meannudin singuin dan mielde maid sin buhtismeahttunvuohta ja rihkkumat ánssášedje, ja mun čihken sis muođuidan.
25 Ná cealká Hearrá Ipmil: Dál mun jorgalan Jakoba vuorbbi, árpmihan Israela álbmoga ja bealuštan áŋgirit iežan bassi nama gudni. 26 Sii vajálduhttet iežaset heahpada ja dan ahte ledje munnje oskkáldasmeahttumat, ja sii besset ássat oadjebassan iežaset eatnamis, iige oktage suorggat sin. 27 Go mun lean buktán sin ruoktot vieris álbmogiid gaskkas ja čohkken sin sin vašálaččaid eatnamiin, de dainna maid mun dagan sidjiide, mun čájehan iežan bassivuođa buot álbmogiid oaidnut. 28 Ja israellaččat ipmirdit ahte mun lean Hearrá, sin Ipmil, danin go seammá ládje go mun dolvon sin eará álbmogiid gaskii, nu mun maid čohkken sin fas sin iežaset eatnamii inge divtte sis ovttage báhcit. 29 Mun in šat čiega sis muođuidan, muhto golggahan iežan vuoiŋŋa Israela álbmoga badjelii. Ná cealká Hearrá Ipmil.