Eatnama juogadeapmi
1 Dát leat čearddaid namat: Davimussan, Hetlona, Lebo-Hamata ja Hasar-Enona guvlui, Damaskusa eatnamis ja Hamatis lulás – Hamat lea Damaskusa guoras – lea Dana oassi nuortin oarjjás. 2 Ašera oassi lea Dana eatnamis lulás nuortin oarjjás. 3 Naftali oassi lea Ašera eatnamis lulás nuortin oarjjás. 4 Manasse oassi lea Naftali eatnamis lulás nuortin oarjjás. 5 Efraima oassi lea Manasse eatnamis lulás nuortin oarjjás. 6 Rubena oassi lea Efraima eatnamis lulás nuortin oarjjás. 7 Juda oassi lea Rubena eatnamis lulás nuortan oarjjás.
8 Juda eatnamis lulás nuortan oarjjás lea bassi eanan, maid dii galgabehtet earuhit Hearrái. Dat lea davvin lulás guoktelogivihttaduhát állana govddu ja nuortin oarjjás seammá guhkki go guđege čeardda oassi, ja bassibáiki lea dan guovdu.
9 Bassi eanan maid dii galgabehtet earuhit Hearrái, lea guoktelogivihttaduhát állana guhku ja guoktelogiduhát állana govddu. 10 Bassi eatnama galgá juohkit ná: Báhpat ožžot eatnama mii lea guoktelogivihttaduhát állana guhku davvin, logiduhát állana govddu oarjin, logiduhát állana govddu nuortin ja guoktelogivihttaduhát állana guhku lullin. Hearrá tempel lea dan guovdu. 11 Eanan gullá vihahuvvon báhpaide geat leat Sadoka nális. Sii bálvaledje mu oskkáldasat eaige čádjidan, nugo levilaččat dahke dalle go Israela álbmot čádjidii. 12 Sii galget oažžut dan sierra oassin bassi eatnamis. Dat lea allabassi ja lea levilaččaid oasi guoras. 13 Levilaččat ožžot báhpaid eatnama guoras eatnama mii lea guoktelogivihttaduhát állana guhku ja logiduhát állana govddu. Oktiibuot bassi eatnama guhkkodat lea guoktelogivihttaduhát állana ja govdodat guoktelogiduhát állana. 14 Das ii oaččo vuovdit iige lonuhit maidege iige sirdit eatnama buoremus oasi earrásiidda, danne go dat lea basuhuvvon Hearrái.
15 Dat viđaduhát állana govdosaš guovlu mii báhcá guoktelogivihttaduhát állana guhkkosaš guovllus, lea dábálaš eanan. Dat gullá gávpogii ja lea viesuid huksema ja guohtuneatnama várás, ja gávpot galgá leat dan guovdu. 16 Dát leat gávpoga mihtut: davábealli lea njealljeduhát vihttačuođi állana, lulábealli njealljeduhát vihttačuođi állana, nuorttabealli njealljeduhát vihttačuođi állana ja oarjjabealli njealljeduhát vihttačuođi állana. 17 Gávpoga guohtuneanan lea davvin guoktečuođi vihttalogi állana, lullin guoktečuođi vihttalogi állana, nuortin guoktečuođi vihttalogi állana ja oarjin guoktečuođi vihttalogi állana. 18 Eanan mii vel báhcá bassi eatnama gurrii, lea logiduhát állana guhku nuortin ja logiduhát állana oarjin. Dan šattu galgá atnit gávpoga bargiid biebmun. 19 Gávpoga bargit geat bohtet buot Israela čearddain, ožžot bargat dan eatnama. 20 Oppa dat guovlu lea juohke bealde guoktelogivihttaduhát geardde guoktelogivihttaduhát állana. Dii galgabehtet earuhit bassi eatnama dainna lágiin ahte oktan gávpoga eatnamiin dat lea njealjehasa hámis.
21 Oaivámuš oažžu dan mii báhcá bassi eatnama ja gávpoga eatnama goappáge beallái, namalassii eatnamiid dan guoktelogivihttaduhát állana guoras nuortin gitta nuortaráji rádjái ja dan guoktelogivihttaduhát állana guoras oarjin gitta oarjeráji rádjái. Dat eatnamat čeardaosiid guoras gullet oaivámužžii. Bassi eanan ja Hearrá tempel dan guovdu 22 leat oktan levilaččaid ja gávpoga eatnamiiguin daid eatnamiid gaskkas mat gullet oaivámužžii. Oaivámuš eaiggáduššá dan eatnama mii báhcá Juda ja Benjamina osiid gaskii.
23 Eará čearddaid guovllut ollet maid eatnama rastá nuortin oarjjás. Ovddemus lea Benjamina čeardda oassi. 24 Simeon oažžu oasi Benjamina eatnamis lulás nuortin oarjjás. 25 Isaskar oažžu oasi Simeona eatnamis lulás nuortin oarjjás. 26 Sebulon oažžu oasi Isaskara eatnamis lulás nuortan oarjjás. 27 Gad oažžu oasi Sebulona eatnamis lulás nuortan oarjjás. 28 Gada eatnama lulábealde manná lullerádji Tamaris gitta Meribat Kadeša ádjagiidda ja de rádjejoga mielde Stuorramerrii. 29 Dát lea dat eanan maid dii galgabehtet juogadit opmodahkan Israela čearddaide, ja dát leat daid oasit. Ná cealká Hearrá Ipmil.
Jerusalema poarttat
30 Dát leat gávpoga poarttat: Davábeale ravddas mii lea njealljeduhát vihttačuođi állana guhku, 31 leat golbma poartta davás guvlui: Rubena poarta, Juda poarta ja Levi poarta. Gávpotpoarttat leat navdojuvvon Israela čearddaid mielde. 32 Nuorttabeale ravddas mii lea njealljeduhát vihttačuođi állana guhku, leat golbma poartta: Josefa poarta, Benjamina poarta ja Dana poarta. 33 Lulábeale ravddas mii lea njealljeduhát vihttačuođi állana guhku, leat golbma poartta: Simeona poarta, Isaskara poarta ja Sebulona poarta. 34 Oarjjabeale ravddas mii lea njealljeduhát vihttačuođi állana guhku, leat golbma poartta: Gada poarta, Ašera poarta ja Naftali poarta. 35 Gávpoga birramihttu lea gávccinuppelohkáiduhát állana. Dán beaivvi rájes gávpoga namma lea “Hearrá lea dáppe”.