1 Samaria lea nággáruššan Ipmilis vuostá
ja šaddá soabahit iežas suddovealggi.
Dan olbmát gahččet miehkkái,
dan njuoratmánát cuvkejuvvojit,
dan áhpehis nissonat luddejuvvojit.
Israel jorgala ja gáddjojuvvo
2 Israel, jorgal Hearrá, Ipmilat, beallái!
Du suttut leat jorralahttán du.
3 Jorgalehket Hearrá beallái,
váldet sániid mielddádet
ja dadjet sutnje:
“Atte ándagassii buot min suttuid
ja váldde vuostá min buoremus attáldaga:
Mii deavdit lohpádusaideamet.
4 Assyria ii beastte min,
mii eat dorvvas heasttaide
eatge šat daja iežamet gieđaid duodjái:
‘Min ipmil!’
Du luhtte áhčiheapme gávdná
árkkálmastinvuođa.”
5 Mun buoridan sin
sin oskkáldasmeahttunvuođas.
Mun ráhkistan sin oppa váimmus,
mu moarri lea jorgalan sis eret.
6 Mun lean Israelii dego suoldni,
ja dat lieđđu dego liljá,
ruohtastuvvá nugo Libanona sederat.
7 Dan suorggit leabbanit,
dat šaddá čáppisin dego oliivamuorra,
das lea njálgga hádja
nugo Libanona vuovddis.
8 Dan suoivanis olbmot besset fas ássat
ja šaddadit gortni,
sii liđđot dego viidnemuorra
man viidni lea máinnolmas
nugo Libanona viidni.
9 Efraim, mii dahkamušaid dus lea šat
eahpeipmiliiguin?
Mun geahčan du beallái ja gozihan du.
Mun lean dego rudnes sypressa,
mus bohtet du šaddosat.
10 Gii lea nu viissis ahte ádde dán,
dárbahassii jierpmálaš fihttet?
Hearrá geainnut leat vuoigadat,
vanhurskásat vádjolit daid,
muhto suttolaččat jorralit.