Babylon gahččá
1 Meahcis. Sátni.
Nugo riđđubiekkat jorret Negevis,
nu juoga boahtá meahcis,
balddihahtti eatnamis.
2 Suorggatlaš oainnáhus
lea addojuvvon munnje:
Beahttit behttet,
hearjideaddjit hearjidit.
“Elam, mana ovddos!
Media, fallet!
Mun loahpahan buot luoibmama.”
3 Dán oainnáhusa dihte
mu rumaš doarggista,
mun dohppehalan ávttaide
dego riegádahtti nisson.
Mun suorganan das maid gulan,
mun gáfestuvan dan maid oainnán.
4 Mu miella lea seahkanan,
mun doarggistan balus.
Eahketveaigi maid mun áibbašin,
gavdnje mu dál.
5 Beavddit lágiduvvojit, ránut lebbejuvvojit,
olbmot borret ja juhket.
Dalle:
“Čuožžilehket, oaivámuččat!
Vuoiddadehket galbbaid!”
6 Ná Hearrá celkkii munnje:
Bija várdájeaddji, gii dieđiha
maid oaidná.
7 Jos son oaidná vovnnaid
maid heasttat gesset,
riidejeddjiid áseniid sealggis,
riidejeddjiid kamelaid sealggis,
de son galgá guldalit, guldalit dárkilit.
8 Ja várdájeaddji čuorvvui:
“Hearrá, beaivvi guhkkut mun várdájin,
mun lean várdobáikkistan juohke ija.
9 Geahča! Dál bohtet olbmát vovnnaiguin
maid heasttat gesset.”
Ja son čuorvvui:
“Gahččan, gahččan lea Babylon!
Buot dan ipmilgovat
leat cuvkejuvvon eatnamii!”
10 Mu álbmot, cuovkkas ráidnejuvvon
gordneráidnensajis,
dan maid lean gullan Hearrás,
Almmiveagaid Ipmilis,
Israela Ipmilis,
dan mun lean almmuhan didjiide.
Edom
11 Sátni Duma hárrái.
Soamis čuorvu munnje Seiras:
“Goziheaddji, goas idja nohká?
Goziheaddji, goas idja nohká?”
12 Goziheaddji vástida:
“Iđit lea boahtán, dattetge lea idja.
Jos dis lea jearramuš, de jerret,
bohtet fastain!”
13 Meahcis. Sátni.
Meahci miestagiid siste
dii galgabehtet idjadit,
Dedana karavánat.
14 Buktet čázi goiki olbmuide,
dii Tema ássit,
mannet báhtareddjiid ovddal, buktet láibbi!
15 Siihan báhtarit miehkis,
rabas miehkis
ja geldojuvvon dávggis,
soađi garasvuođas.
16 Gullet maid Hearrá lea cealkán munnje: Jagi geažes – bálkásoahteolbmá bálkábeivviid mielde rehkenastojuvvon – Kedara stuorisvuohta lea nohkan, 17 ja dan čeahpes dávgebáhččiin leat báhcán dušše muhtumat. Hearrá, Israela Ipmil, lea sárdnon.