1 Dan beaivvi Hearrá časká mihkiinis,
garra, stuorra ja bastilis mihkiinis
Leviatana, johtilis gearbmaša,
Leviatana, moalkasaddi gearbmaša.
Hearrá goddá čieŋalvuođa guovddi.
Hearrá viidnegárdi
2 Lávlot dan beaivvi
hearvás viidnegárddi lávlaga!
3 Mun, Hearrá, lean dan goziheaddji.
Juohke čalbmeravkalanbottu
mun láktadan dan.
Mun várjalan dan ija beaivvi,
vai ii mihkkege vahágahte dan.
4 Mun in leat suhttan dasa,
muhto jos dat addá munnje
bastilislánjáid ja gáskálasaid,
de mun soađan dainna
ja boalddán buot,
5 juos sii eai oza suoji mu luhtte
ja daga ráfi muinna,
daga duođaid ráfi muinna.
Hearrá čohkke iežas álbmoga
6 Boahttevaš beivviid
Jakob ruohtastuvvá,
Israel šaddá ja lieđđu
ja deavdá eatnama šaddosiiguin.
7 Časkojuvvojedjego sii
dego dat geat časke sin,
goddojuvvojedjego sii
nugo dat geat godde sin?
8 Muttátvuođain don bagadit álbmoga
go baldet ja ádjet dan eret.
Hearrá ájii dan eret riđuinis
nuortabiekka beaivvi.
9 Dan dihte Jakoba suddovealgi
sáhttá lonistuvvot,
ja su suddu váldojuvvo eret:
Son diktá cuvket áltára geđggiid moallun,
eaige ašeračuolddat ja suovasáltárat
šat ceggejuvvo.
10 Ladnegávpot báhcá guorusin,
hilgojuvvon ássanbáikin,
ávdimin dego meahcci.
Doppe guhtot gálbbit,
doppe dat livvadit
ja borret buot dan ovssiid.
11 Go oavssit goiket,
de bohtet nissonat, dodjet daid
ja cahkkehit dola.
Dát lea álbmot mas ii leat jierbmi,
dan dihte dan sivdnideaddji
ii árpmit dan,
dan hábmejeaddji ii leat dasa árbmugas.
12 Dan beaivvi Hearrá časká
gortniid eret gordneoivviin
Eufrata rájes Egyptajoga rádjái,
ja ovttaid ovttaid dii israellaččat
čoggojuvvobehtet.
13 Dan beaivvi gullo stuorra dorvve jietna,
ja buohkat bohtet,
dat geat ledje láhppon Assyriai,
dat geat ledje bieđganan Egyptii,
ja sii rohkadallet Hearrá
Jerusalema bassi váris.