Rivttes fástu ja sabbat
1 Čuorvvo jur vehkosii,
divtte iežat jiena skádjat dorvve láhkái!
Muital mu álbmogii dan rihkkumiid,
Jakoba sohkii dan suttuid.
2 Beaivvis beaivái sii mahkáš ohcet mu
ja dáhttot oahppat mu geainnuid.
Dego álbmot mii meannuda vuoiggalaččat
iige leat hilgon Ipmilis lága,
sii bivdet mus neavvagiid
dan hárrái mii lea riekta,
bivdet Ipmila iežaset beallái ja dadjet:
3 “Itgo don fuobmá ahte mii fástudit?
Itgo don oainne,
mo mii váivvidit iežamet?”
De oainnán! Dii doaimmahehpet áššiideattet
fástobeaivvige,
dii barggahehpet garrasit bálvváideattet.
4 Go dii fástudehpet,
de lea riidu ja bealku
ja heahpatlaš doarru.
Go dii fástudehpet nugo dál,
de din rohkos ii gullo allagassii.
5 Dátgo lea dakkár fástu maid mun
dáhtun:
ahte olbmot givssidit iežaset,
sojahit oaivvi hoašša láhkái,
gárvodit horstabiktasiid
ja veallájit gunaid siste?
Dángo dii gohčodehpet fástun,
beaivin mii lea Hearrá miela mielde?
6 Earálágán fásttu mun dáhtun:
ahte čoavddát sivahemiid láhkkiin,
botket geassá báttiid
ja luoittát luovus sordojuvvon olbmuid,
ahte doaját buot geassáid,
7 doadjalat láibbát nelgon olbmui,
válddát vissosat ruovttuhis váivvána,
ja jos oainnát álás olbmo,
de bivttastat su
itge jorgal sealggi iežat villjii.
8 Dalle du čuovga ihtá
dego iđedisguovssu,
ja du hávit savvojit johtilit.
Vanhurskkisvuohta ieš
manná du ovddas,
ja Hearrá hearvásvuohta
boahtá du maŋušin.
9 Dalle Hearrá vástida go don rávkkat su,
go don čuorvvut, de son cealká:
“Dás mun lean.”
Jos don heaittát buot soardima
gaskkastat,
loahpahat áitagiid, hiddjádusaid
ja bahádallama,
10 jos doadjalat iežat láibbis
dasa gii nealgu
ja gallehat dan gii gillá heađi,
de dalle ihtá čuovga du seavdnjadassii,
du idja šaddá čuvges beaivin.
11 Hearrá láide du álo,
son galleha du guorba eatnamis.
Son nanne du rupmašfámu,
ja don leat dego čáhccás gilvvagárdi,
nugo čáhceája man čáhci
ii goassege noga.
12 Du boares viessobázahasat
huksejuvvojit ođđasis,
ja don divut vuođđudusaid
maid dološ buolvvat leat bidjan.
Don gohčoduvvot
“gaikánemiid muvrejeaddjin”,
“danin gii dahká
gaikojuvvon viesuid oruhahttin”.
13 Jos it rihko sabbaha
itge doaimmat fitnuidat
mu bassebeaivvi,
jos gohčut sabbaha illubeaivin
ja Hearrá bassebeaivvi gudni beaivin,
jos anát dan alla árvvus
itge bargga maid lávet,
it doaimmat fitnuidat
itge sártno joavdelasaid,
14 de dalle don beasat illudit Hearrás,
mun doalvvun du eatnama alážiid badjel
ja divttán du ealihit iežat
áhčát Jakoba opmodagas.
Ná Hearrá lea sárdnon.