Jerusalema hearvás boahtteáigi
1 Čuožžil, šearrá, Jerusalem!
Du čuovga boahtá,
Hearrá hearvásvuohta badjána
du badjelii.
2 Seavdnjadas gokčá eatnama,
álbmogiid badjel lea mierká,
muhto du albmái badjána iđedisguovssu,
Hearrá hearvásvuohta suonjarda
du badjelis.
3 Álbmogat vádjolit du čuovgga guvlui,
gonagasat du iđedisgukso guvlui.
4 Bajit čalmmiid, geahča birra:
Buohkat leat čoahkkanan,
sii bohtet du lusa,
du bártnit geat bohtet guhkkin,
du nieiddat geat guddojuvvojit salas.
5 Don oainnát buot dan ja báittát ilus,
du váibmu ravká, du raddi viidu,
go meara dávvirat šaddet du oapmin
ja álbmogiid riggodagat
addojuvvojit du gihtii,
6 go kamelaid eatnatvuohta,
Midjana ja Efa kamelavárssáid márra
gokčá du eatnama.
Buot Saba olbmot bohtet
golli ja suovvasat vel noađđin,
ja sii buohkat gulahit Hearrá gudni.
7 Kedara sávzaealut čoggojuvvojit
du lusa,
Nebajota vierccat leat du,
dat oaffaruššojuvvojit dohkálaš oaffarin
mu áltára alde.
Nu mun hearvásmahtán iežan tempela.
8 Nabai duot mat bohtet girddi
dego balvvat,
nugo duvvát vissoseaset – geat sii leat?
9 Gáiddus rittuid fatnasat čoagganit,
Taršiša-skiippat njunnošis.
Dat buktet du bártniid guhkkin,
buktet sin silbbaid ja golliid
Hearrá, du Ipmila, nama gudnin,
Israela Basi gudnin.
Son addá dutnje hearvásvuođa.
10 Vierrásat huksejit du muvrraid,
sin gonagasat bálvalit du.
Moaristan mun ráŋggáštin du,
muhto ráhkisvuođastan
mun du árpmihan.
11 Du poarttat orrot rabasin álelassii,
eai dat dahppojuvvo beaivet eaige ihkku.
Daid ráigge álbmogiid riggodagat
buktojuvvojit dutnje,
daid bokte gonagasat mieđuštuvvojit
du lusa.
12 Muhto álbmot ja riika mii ii bálval du, duššá, dat jávkaduvvo eatnama alde.
13 Libanona riggodat
buktojuvvo du lusa,
sypressat, beazit ja buksbommuorat,
čiŋahit mu bassibáikki.
Mun gudnejahtán julggiidan saji.
14 Du sordiid bártnit bohtet ja gopmirdit
du ovdii,
ja buohkat geat leat badjelgeahččan du,
luoitádit du julggiid ovdii.
Sii gohččot du Hearrá gávpogin,
Sionin mii gullá Israela Bassái.
15 Ovdal don ledjet
hilgojuvvon ja duššášuvvon,
iige oktage galledan du.
Muhto mun dagan du agálaš goargun,
illun buolvvas bulvii.
16 Vieris álbmogat njamahit du,
gonagasat du bibmet,
ja dalle don ipmirdat
ahte mun, Hearrá, lean du beasti,
ahte du lonisteaddji lea Jakoba Veagalaš.
17 Mun buvttán dutnje golli
veaikki sadjái,
mun attán dutnje silbba
ruovddi sadjái,
veaikki muora sadjái
ja ruovddi geađggi sadjái.
Ráfi šaddá du eiseváldin,
vuoiggalašvuohta du fáldin.
18 Ii gullo šat veahkaváldi du eatnamis,
ii hearjideapmi iige billašupmi
du rádjemearkkaid siskelis.
Mu veahkki lea dus muvran
ja mu rámádus lea dus poartan.
19 Beaivváš ii leat šat du čuovgan beaivet
iige mánoheahpi šat čuvge du geainnuid,
muhto Hearrá lea du agálaš čuovga
ja du Ipmil lea du hearvásvuohta.
20 Du beaivváš ii šat eambbo luoitát
iige mánnu nuosa,
danin go Hearrá lea du agálaš čuovga.
Du moraštanáigi lea nohkan.
21 Dalle buot du olbmot leat
vanhurskásat,
sii atnet eatnama oapmineaset
agálaš áigái.
Sii leat vesát maid mun lean gilván,
mu gieđaid dahku mainna
mun čájehan iežan hearvásvuođa.
22 Unnimus šaddá duhát olbmo veahkan,
heajumusge veagalaš álbmogin.
Mun, Hearrá,
divttán dan šaddat fáhkkestaga,
go áigi lea boahtán.