Debora lávlla
1 Dan beaivvi Debora ja Barak, Abinoama bárdni, lávlluiga dán lávlaga:
2 Israel čuožžilii soahtat,
álbmot lei gearggus.
Máidnot Hearrá!
3 Gullet, gonagasat!
Guldalehket, oaivámuččat!
Mun lávllun Hearrái,
mun máinnun Israela Ipmila.
4 Hearrá, go don vuolggát Seiras,
go don manat ovdan Edoma eatnamis,
de eanan doarggista,
dalle almmit goikot,
balvvat šoalahit čázi.
5 Várit doarggistit Hearrá,
Sinai Hearrá, muođuid ovddas,
Hearrá, Israela Ipmila, muođuid ovddas.
6 Šamgara, Anata bártni, áiggiid,
Jaela beivviid máđijat ledje ávdimat,
mátkkálaččat manne mohkkás bálgáid.
7 Njunnošat eai šat dihtton,
Israela siiddat ledje ávdimat.
Dalle don, Debora, čuožžilit,
don, Israela eadni, loaiddastit ovdan.
8 Ipmil bovdii ođđa njunnošiid
go soahti lei poarttaid ovddas.
Ii lean galba, ii oktage sáiti
Israela njealljelogiduháha gieđas.
9 Mu váibmu ravká
Israela oaivámuččaide,
dan álbmogii mii lei mieđis čuovvulit.
Máidnot Hearrá!
10 Dii geat riidebehtet
vilges ásendámmáiguin,
dii geat čohkkábehtet ránuid alde,
dii geat vádjolehpet bálgáid,
lávlot!
11 Jugahangárcuid luhtte
rámiduvvojit Hearrá dagut,
su vuoittut Israela njunnošis.
Dalle Hearrá álbmot manai poarttaid vuostá.
12 Čuožžil, Debora, čuožžil!
Čuožžil ja lávllo lávlaga!
Čuožžil, Barak,
váldde fáŋgan vašálaččaid,
Abinoama bárdni!
13 Dalle bohte Israela jálus olbmát,
Hearrá álbmot oktan sáŋgáriiddisguin.
14 Efraima njunnošat bohte duolbadasas,
sii čuvvo du, Benjamin, ja du álbmoga.
Makiris bohte oaivámuččat,
Sebulonis olbmát ráđđensoabbi gieđas.
15 Isaskara oaivámuččat
čuovvuledje Debora,
Isaskar, Baraka doarjja,
vulggii suinna duolbadassii.
Rubena sogat ráđđádalle guhká.
16 Manin don ádjánit
oapmegárddiid gaskkas, Ruben,
guldalit báimmannjurggona jiena?
Rubena sogat ráđđádalle guhká.
17 Gilead bisui don bealde Jordana.
Manin ájahalai Dan skiippaid luhtte?
Ašer bisui mearragáttis,
orodii stáffuidis guoras.
18 Sebulona álbmot ii ballan jápmimis,
ii Naftali álbmotge,
go alážiin lei soahti.
19 Gonagasat bohte soahtat,
Kanaana gonagasat sohte Taanakis,
Megiddo čáziid gáttiin.
Eai sii ožžon sálašin silbba.
20 Almmi násttitge ledje falleheamen,
raŧiineaset dat sohte Siserain.
21 Kišonjogaš doalvvui vašálačča eret,
Kišon, dološáigásaš jogaš!
Ovddos, mu siellu, fámolaččat!
22 Heasttagaccat dulbme eatnama,
oret luite olles doalvvi.
23 Garuhehket Merosa, cealká Hearrá eŋgel,
garuhehket dan ássiid,
go eai boahtán Hearrái veahkkin,
veahkehit Hearrá ja su soahteolbmáid.
24 Rámiduvvon ovdalii eará nissoniid
lea Jael, kenlaš Hebera áhkká,
rámiduvvon nisson
johtti olbmuid gaskkas.
25 Sisera ánui čázi,
mielkki Jael attii,
buvttii lávcca hearvás lihtis.
26 Son dohppii giddennávlli,
olgeš gihtii šluppoha.
Nu son časkkii Sisera,
cuvkii su oaivvi,
ráiggai ja luddii su geađđaša.
27 Jaela julggiid ovdii ravggai Sisera,
gahčai, bázii veallát.
Jaela julggiid ovdii son ravggai,
gosa ravggai, dasa bázii jábmin.
28 Sisera eadni geahččá láseráigge,
čurve čeargalasa čađa:
“Manne ádjánit su vovnnat?
Manne eai gullo su heasttaid lávkkit?”
29 Viisámus hoavvanisson vástida,
eadni geardu su sániid:
30 “Várra leat juogadeamen sállaša.
Nieida dahje guokte guhtiige,
hearvabiktasat sálašin Siserai,
hearvabiktasat sálašin,
moadde girjeliinni dan čeabehii
gii váldojuvvo sálašin.”
31 Nu duššet buot du vašálaččat, Hearrá.
Muhto dat geat ráhkistit Hearrá
leat dego beaivváš
go dat badjána oppa fámustis.
De eatnamis lei ráfi njealljelogi jagi.