Hearrá ja eahpeipmilat
1 Gula, Israela álbmot, maid Hearrá sárdnu dutnje!
2 Ná cealká Hearrá:
Allet hárjet iežadet
eará álbmogiid vieruide,
allet bala almmi mearkkain
mat baldet eará álbmogiid.
3 Sin vierut leat duššálaččat.
Sii njeidet vuovddis muora,
ja muorraduojár hábme dan luovččaniin.
4 Son čiŋaha dan silbbain ja golliin
ja gidde dan sadjásis
veahčiriin ja návlliiguin,
amas juovzut.
5 Dat leat dego
loddegavnnjat gurkábealddus,
eai dat máhte sárdnut.
Go dat eai máhte vázzit,
de daid ferte guoddit.
Allet bala dain! Dat eai daga baháid,
muhto eai dat gal máhte dahkat buriidge.
6 Hearrá, ii oktage leat du veardásaš!
Don leat stuoris,
du namma lea stuoris ja fámolaš.
7 Gii ii balaše dus, álbmogiid gonagas?
Dat lea du vuoigatvuohta.
Dasgo buot álbmogiid viisáid gaskkas,
buot sin gonagasaid gaskkas
ii leat oktage nugo don.
8 Jallat ja jierpmeheamit sii leat buohkat,
duššálaš lea sin ipmiliid oahppa.
Duot ipmilat leat duddjojuvvon muoras,
9 derpojuvvon Taršiša silbbas
ja Ufasa gollis,
muorraduojárat ja gollerávdit
leat daid duddjon.
dain leat alitrukses
ja purpurrukses biktasat,
ja dat buot leat dáiddáriid duojit.
10 Muhto Hearrá lea duohta Ipmil,
son lea ealli Ipmil ja agálaš gonagas.
Eanan doarggista su vašis,
álbmogat eai gierdda su moari.
11 Celket sidjiide: Ipmilat mat eai leat dahkan almmi ja eatnama, jávket eatnamis ja almmi vuolde.
12 Hearrá dagai eatnama fámuinis,
vuođđudii máilmmi viisodagainis
ja lebbii almmi ipmárdusainis.
13 Go su jietna gullo,
de almmi čázit šávvagohtet.
Son bajida balvvaid eatnama ravddas,
son bidjá álddagasaid šleađgut
ja arvvi šoallat,
son luoitá biekka vuorkágámmáriinnis.
14 Juohke olmmoš lea jierpmeheapme
ja diehtemeahttun.
Juohke gollerávdi šaddá heahpanit
ipmilgovainis,
su leikejuvvon govat leat beahtus,
ii dain leat mihkkege vuoiŋŋaid.
15 Dat leat duššálaččat,
duojit maid olbmot bilkidit.
Ráŋggáštanáiggi dat duššet.
16 Daid láhkásaš ii leat Jakoba Ipmil.
Son lea ráhkadan buot,
ja Israel lea su iežas álbmot.
Su namma lea Hearrá, Almmiveagaid Ipmil.
Hearrá bagada Jerusalema
17 Čohkkejehket gurppiideattet,
dii fertebehtet vuolgit eatnamis!
Din gávpot lea birastahttojuvvon.
18 Ná cealká Hearrá:
Dán geardde mun šleŋgen eret
eatnama ássiid.
Mun áŧestan sin,
vai sii gávnnašedje mu.
19 Vuoi mu, vuoi mu sárjjiid!
Mu hávvi lea buoritmeahttun.
Mun jurddašin: Dát lea dušše givssádus
maid mun ferten gierdat.
20 Mu goahti lea biđgejuvvon,
dan báttit botkkoduvvon.
Mu mánát leat vuolgán mu luhtte,
sii eai leat šahtain.
Ii leat šat oktage
ceggemin ja loavdimin mu goađi.
21 Dasgo guođoheaddjit leat jierpmeheamit
eaige oza Hearrá.
Danne sii eai lihkostuva,
ja nu oppa sin eallu bieđgana.
22 Gullabehtetgo? Dat lahkona,
garra julla davvieatnamis!
Dat dahká Juda gávpogiid ávdimin,
šakálaid orrunsadjin.
Profehta rohkadus
23 Hearrá, mun dieđán
ahte olbmo geaidnu ii leat su válddis,
iige vádjoleaddji ieš stivre lávkkiidis.
24 Bagat mu, Hearrá, dattetge muttágit!
Ale moaráhuva munnje,
amat dahkat mu áibbas heittohin.
25 Golggat moarát álbmogiid badjelii
mat eai dovdda du,
daid sogaid badjelii
mat eai čuorvvo du nama.
Siihan leat loaktán Jakoba,
duššadan su
ja dahkan su eatnama ávdimin.