1 Israel, jos don jorgalat,
de beasat máhccat mu lusa, cealká Hearrá.
Jos don jávkadat fasttes eahpeipmiliiddát
mu muođuid ovddas,
de it dárbbaš leat golgosis.
2 Dalle don vuortnut rehálaččat,
rievttuid ja vuoiggalaččat:
“Nu duohta go Hearrá eallá”,
ja álbmogat buressivdnidit
iežaset su nama bokte
ja rámidit su.
3 Ná cealká Hearrá
Juda olbmáide ja Jerusalemii:
Jorgot alcceseattet ođđa eatnama!
Allet gilvve bastilislánjáid gaskii.
4 Birračuohpahehket iežadet Hearrái,
váldet eret váimmu ovdaliikki,
dii Juda olbmát ja Jerusalema ássit!
Muđui mu moarri njivžula
din bahás daguid dihte dego dolla,
iige dat leat čáskadeames.
Ráŋggáštus boahtá davvin
5 Almmuhehket Judas,
gulahehket Jerusalemis,
bossot dorvve oppa eatnamis,
čurvot jitnosit:
Čoahkkanehket, mannot
ladnegávpogiidda!
6 Bajidehket soahteleavgga! Sionii!
Báhtarehket, allet bisán!
Dasgo mun vuolggahan
lihkuhisvuođa davvin,
stuorra heavahusa.
7 Ledjon lea lihkkan suovkkastis,
álbmogiid duššadeaddji
lea lihkkasan mátkái,
vuolgán báikkistis
dahkat du eatnama ávdimin.
Du gávpogat duššaduvvojit,
iige oktage sáhte ássat dain.
8 Gárvodehket horstta,
váidalehket ja bárgot!
Hearrá buolli moarri ii leat gáidan mis.
9 Dan beaivvi, cealká Hearrá,
gonagas ja oaivámuččat dorvvuhuvvet,
báhpat suorganit
ja profehtat hirpmástuvvet.
10 Sii dadjet: “Vuoi Hearrá, min Ipmil!
Don leat beahttán
dán álbmoga ja Jerusalema.
Don celket: ‘Ráfi šaddá din oassin’,
muhto dál miehkki lea min čoddaga vuostá.”
11 Dan áigge celkojuvvo
Jerusalemii ja oppa dán álbmogii:
Buolli biegga boahtá
meahci báljes alážiin
mu álbmoga njeaiga.
Dat biegga ii heive gortniid suohppumii
iige ráidnemii.
12 Biegga maid mun vuolggahan,
lea dasa ilá garas.
Dál mun cealkkán didjiide duomu.
13 Vašálaš badjána dego bajánbalva,
su vovnnat leat dego riđđu,
su heasttat leat falibut go goaskimat.
Vuoi min, mii duššat!
14 Jerusalem, basa váimmot bahávuođas,
vai bestojuvvošit.
Man guhká don divttát
bahás jurdagiid ássat iežat siskkildasas?
15 Dasgo Danis gullo áirasa jietna,
dat gulaha lihkuhisvuođa Efraimváriin.
16 Dieđihehket dan álbmogii,
gulahehket Jerusalemii:
Birastahttit bohtet gáiddus eatnamis,
sii bajidit soahtečuorvasa
Juda gávpogiid vuostá.
17 Dego bealdduid fávttat
sii birastahttet eatnama,
danne go dat lea stuibmidan mu vuostá,
cealká Hearrá.
18 Du eallin ja du dagut
leat buktán dutnje dán oasehisvuođa.
Dakkár lea du bahávuohta, dat lea bahča
ja čuohcá du iežat váibmui.
19 Vuoi mu! Vuoi mu!
Mun botnjasattan bákčasiin.
Mu váibmu šoavvá, mu siskkildas buollá!
Mun in sáhte orrut jávohaga.
Mun gulan dorvečuodjama
ja soahtečuorvasiid.
20 Duššadeapmi duššadeami ala,
oppa eanan lea duššaduvvon!
Fáhkkestaga mu goađit leat biliduvvon,
mu loavdagat gaikkoduvvon
čalbmeravkalanbottus!
21 Man guhká mun ferten
oaidnit soahteleavggaid,
gullat soahtedorvviid jiena?
22 Mu álbmot lea jierpmeheapme,
dat ii dovdda mu.
Sii leat dáidemeahttun mánát,
ii sis leat áddejupmi.
Sii leat čeahpit dahkat bahá,
muhto eai máhte dahkat buori.
23 Mun geahčadin eatnama
– dat lei ávdin ja guorus,
ja almmi – dan čuovga lei jávkan.
24 Mun geahčadin váriid
– dat doarggistedje,
ja buot dievát sparaidedje.
25 Mun gehččen
– ii oidnon oktage olmmoš,
buot almmi lottitge ledje báhtaran.
26 Mun geahčadin šaddogárddi
– dat lei visot guorban,
buot gávpogat ledje gaikkoduvvon.
Buot dán lea dahkan Hearrá buolli moarri.
27 Ná cealká Hearrá:
Oppa eanan šaddá ávdimin,
muhto datte mun in loahpat dan áibbas.
28 Eanan morašta,
ja albmi dan badjel sevnnjoda.
Muhto maid lean sárdnon ja mearridan,
in mun gáđa inge das jorggit.
29 Riidejeddjiid ja dávgebáhččiid šlámas
báhtara juohke gávpot.
Olbmot čiehkádit suhkkes vuvddiide,
gorgŋot bávttiid ala.
Buot gávpogat leat hilgojuvvon,
ii oktage báze ássat daidda.
30 Maid dalle ávkkuha
ahte don gárvodat purpurbiktasiid,
čiŋadat golliin,
stuorrudat čalmmiidat ivnniin?
Duššás don čiŋadat:
Du ráhkisteaddjit leat hilgon du,
sii bivdet dál du heakka.
31 Mun gulan
dego riegádahtti nissona jiena,
dego nissona bárgasa
go son riegádahttá vuosttašriegádeaddjis.
Dat lea nieida Siona jietna.
Son fuoiku, son geaigguha gieđaid:
“Vuoi mu! Mun lean vuoimmeheapme,
mun gahčan olmmošgoddiid gihtii!”