1 Job sártnui ain ja celkkii:
2 Nu duohta go Ipmil eallá,
Buotveagalaš guhte lea biehttalan mus
vuoigatvuođa
ja deavdán mu bahčavuođain:
3 Nu guhká go mus lea eallinvuoiŋŋanas,
nu guhká go mu njunis
lea Ipmila vuoiŋŋahat,
4 de mu baksamat eai sártno vearrivuođa
iige mu njuovčča savkkut behttosa.
5 Mun in goassege mieđa
ahte dii lehpet vuoigadis!
Mun lean sivaheapme,
dan mun čuoččuhan dassá go jámán.
6 Mun doalan gitta vanhurskkisvuođastan,
dan mun in luoitte.
Mus ii leat mihkkege maid cuiggodit alddán.
7 Vare mu vašálaččaide geavašii
nugo baháide,
mu vuostálastiide
nugo geavvá vearredahkkiide!
8 Makkár doaivu lea ipmilmeahttumis
go jápmin boahtá,
go Ipmil váldá su heakka eret?
9 Ii Ipmil gula su čuorvasa
go áŧestus deaivida su.
10 Sáhttágo son ávvudit Buotveagalaččas,
čuorvut Ipmila juohke áigge?
11 Mun oahpahan didjiide
makkár lea Ipmila fápmu,
mun in čiega Buotveagalačča áigumušaid.
12 Diihan lehpet ieža oaidnán dan.
Manne dii dalle sárdnubehtet
diekkár duššálaš sániid?
13 Dát lea oassi
maid Ipmil addá bahás olbmui,
vuorbi maid Buotveagalaš
mearrida veahkaválddálažžii:
14 Vaikko sus livčče bártnit ollu,
de sii gahččet miehkkái,
su mánát eai beasa borrat gallás.
15 Daid geat leat beassan báhtui,
goddá rohttudávda,
leaskkat eai oaččo doallat váidalusaid.
16 Ipmilmeahttun guhppe silbba
dego muoldda
ja rábida alccesis biktasiid čopman,
17 muhto vanhurskásat gárvodit daid,
ja vigiheamit juogadit silbba.
18 Viessu maid son hukse,
lea dego lottibeassi,
nugo lastagoahti
maid bealdofáktejeaddji lea ráhkadan.
19 Rikkis olmmájin son veallána,
muhto go son rabasta čalmmiid,
de visot lea jávkan.
20 Suorggahusat jokset su dego čáhcedulvi,
ihkku garra biegga doalvu su eret.
21 Nuortabiegga lokte su bajás
ja dohppe su mielddis.
22 Seasttekeahttá dat šluvgá su,
ja son bággehallá báhtarit.
23 Biegga speažžu gieđaid bilkidemiin,
dat njurgu sutnje go doalvu su eret
dan báikkis gos son ásai.