1 Silba roggojuvvo ruvkkes,
gollis lea iežas gávdnansadji,
2 ruovdi váldojuvvo eatnamis
ja veaiki suddaduvvo luovos geađggis.
3 Olmmoš jávkada seavdnjadasa
ja bahkke vuolimus čiekŋalassii,
vai beassá dutkat bávtti mii lea čihkosis
seavdnjadeamos ijas.
4 Son roggá ráiggiid
dohko gos olbmot eai oro.
Vajálduvvan sajiin
maid olbmo juolgi ii leat vázzán,
olbmát heaŋgájit ráippiid veagas
gáidosis olbmuin.
5 Eatnamis boahtá láibi,
dan čieŋalvuođas buot earáhuvvá
dego dola fámus.
6 Dan bávttis lea safira,
eatnama čievrras golli.
7 Gazzaloddi ii dovdda bálgá dohko,
fálli čalbmi ii dan oainne,
8 goargadis boraspiret eai dan duolmma,
doppe ii vácce ledjon.
9 Olmmoš bargá garra geađggi,
jorgu váriid vuođđudusaidge,
10 čuollá báktái ráiggi,
ja buot mii lea mávssolaš,
boahtá oidnosii.
11 Son buođđu čáhcesuonaid,
buktá čuovgasii čiegus diŋggaid.
12 Muhto viissisvuohta,
gos dan sáhttá gávdnat?
Gos lea ipmárdusa ássansadji?
13 Olmmoš ii dovdda geainnu dan lusa,
dat ii leat gávdnamis ealli olbmuid eatnamis.
14 Čiekŋalas dadjá:
“Ii viissisvuohta leat dáppe”,
áhpi cealká:
“Ii dat leat dáppege.”
15 Dan ii sáhte oastit golliin,
dan hatti ii sáhte vihkket silban,
16 dat ii leat oastimis Ofira golliin,
ii mávssolaš onyksgeđggiin iige safirain.
17 Ii golli, ii šearradeamos láse leat
viissisvuođa veardásaš,
ii oktage sáhte lonuhit dan alccesis
fiidnámus gollelihtiiguin,
18 velá uhcit korállaiguin
ja kristállaiguin.
Buoret lea oamastit viissisvuođa
go bearraliid.
19 Nubia topása ii leat
viissisvuođa veardásaš,
viissisvuohta ii leat oastimis
čielga golliin.
20 Gos dalle boahtá viissisvuohta?
Gos lea ipmárdusa ássansadji?
21 Dat lea čihkkojuvvon
buot heakkalaččaid čalmmiin,
velá almmi lottitge eai oainne dan.
22 Gáđohus dadjá, jápmin dadjá:
“Dat lea dušše beaggán deike.”
23 Muhto Ipmil dovdá geainnu
viissisvuođa lusa,
son diehtá gos dan ássansadji lea.
24 Son geahččá máilmmi ravddaid rádjái,
son oaidná buot mii lea almmi vuolde.
25 Go son mearridii biekka deattu
ja bijai čáziide mihtu,
26 go son ásahii arvái lága
ja mearridii bajándálkki geainnu,
27 dalle son áiccai viissisvuođa
ja dutkkai dan,
dovddiidii dan ja guorahalai dan.
28 Ja son celkkii olbmui:
“Lea viissisvuohta ballat Hearrás,
gáidat bahás lea ipmárdus.”