Job vástida Bildadii
1 Dál Job sártnui:
2 Mun dieđán vissásit mo dat lea:
Ii olmmoš sáhte leat vuoigadis
Ipmila vuostá.
3 Jos Ipmil dáhtošii áššáskuhttit olbmo,
de olmmoš ii máhtáše vástidit
oktiige duhát váidagis.
4 Čieŋal lea su viisodat, stuoris su fápmu.
Gii sáhtášii nágget su vuostá
gillákeahttá vahága?
5 Son sirdá váriid
ovdal go dat oppa fuobmájitge,
son njeaidá daid moaristis,
6 son doarggistahttá eatnama
nu ahte dat sirdása,
ja dan báccit suibot.
7 Son gieldá beaivváža, iige dat badján,
son gokčá seaillainis násttiid čuovgga.
8 Son okto lea lebben almmi,
son johtá ábi báruid badjel.
9 Dávggáid ja Gállábártniid
son lea dahkan,
Nieidagihpu ja lullealmmi
násttiid govadagaid.
10 Son dahká stuorra daguid
maid ii oktage veaje suokkardit,
oavdduid almmá logu haga.
11 Son rasttilda mu geainnu,
inge mun oainne su,
son manná mu meaddel,
inge mun su fuomáš.
12 Gii sáhttá hehttet su,
go son dohppe juoidá gihtii?
Gii sáhttá dadjat sutnje: “Maid don dagat?”
13 Ipmil ii doalahatta moaris,
Rahaba veahkage gopmirda su ovdii.
14 Man sakka uhcit dalle mun sáhtášin
vástidit sutnje,
mo gávnnašin rievttes sániid su vuostá?
15 Vaikko mun livččen vuoigadis,
de mun in máhtáše vástidit,
mun ferten átnut árpmu sus gii dubme mu.
16 Vaikko mun čurvvošin,
de in mun jáhke su guldalit mu jiena.
17 Son cuvke mu riđuinis
ja dahká munnje eatnat háviid
almmá siva haga.
18 Son ii suova mu geassit vuoiŋŋahaga,
muhto deavdá mu bahča bákčasiin.
19 Jos lea sáhka fámus,
– son lea gievrramus.
Jos lea sáhka vuoigatvuođas,
de son jearrá: “Gii stevdne mu?”
20 Vaikko mun lean vuoigadis,
de mu iežan njálbmi dubme mu.
Vaikko lean sivaheapme,
de son dubme mu sivalažžan.
21 Mun lean sivaheapme!
Eallin ii mearkkaš munnje maidege,
mun in dáhto šat eallit.
22 Ovtta dat dahká, dan dihte mun dajan:
Sivaheapme dahje sivalaš
– son duššada goappašagaid.
23 Go lihkuhisvuohta fáhkkestaga goddá,
de son bilkida vigihemiid heađi.
24 Eanan lea addojuvvon
ipmilmeahttumiid gihtii,
son gokčá duopmáriid čalmmiid.
Jos dat ii leat son,
de gii dat dalle lea?
25 Mu beaivvit girdet johtileappot
go viehkki olmmoš,
dat báhtarit mus oainnekeahttá ilu.
26 Dat jávkkihit dego hoaššafatnasat,
dat mannet dego goaskin mii njuolasta
sállaša maŋŋái.
27 Jos mun dajan:
“Dál mun vajáldahtán iežan morraša,
mun moddján ja čájehan ilolaš muođuid,”
28 de mun goitge balan das
maid šattan gillát.
Mun dieđán ahte don
it dubme mu sivaheapmin.
29 Go mun dattetge adnojuvvon sivalažžan,
manne mun dalle ražašin duššiid?
30 Vaikko mun basadivččen muohttagis
ja buhtistivččen gieđaidan gutnačázis,
31 de don cokkadivččet mu durderokkis,
nu ahte mu biktasat fasttášivčče mu.
32 Son ii leat olmmoš nugo mun.
Mun in sáhte vástidit sutnje
ja mannat suinna diggái.
33 Vare livččii dakkár gaskaolmmái
gean moai goappašagat
fertešeimme jeagadit!
34 Vare son heaittášii cápmimis mu,
vare su suorggahusat eai mu balddihivčče!
35 Dalle mun sártnošin balakeahttá.
Dál mun in dan sáhte.