Josua

Guoktenuppelohkái muitogeađggi

¹ Go oppa álbmot lei rasttildan Jordana, de Hearrá celkkii Josuai: ² “Válljejehket álbmogis guoktenuppelohkái olbmá, ovtta guđege čearddas. ³ Gohččot sin váldit Jordanis guoktenuppelohkái geađggi dan báikkis gokko báhpat čužžot, ja doalvut daid dan báikái gos orrubehtet boahtte ija.”

⁴ Josua válljii israellaččain guoktenuppelohkái olbmá, ovtta guđege čearddas, ⁵ rávkkai sin lusas ja dajai sidjiide: “Mannet Hearrá, din Ipmila, árkka lusa gasku Jordana ja bajidehket iešguhtege ovtta geađggi oalggi ala, nu ahte dat leat Israela guoktenuppelohkái čeardda logu mielde. ⁶ Geađggit leat mearkan din gaskkas. Go din mánát de muhtumin jerret manin dát geađggit leat ceggejuvvon, ⁷ de galgabehtet vástidit sidjiide: ‘Jordana čázit bisánedje Hearrá lihtuárkka ovddas. Go árka manai Jordanii, de Jordana čázit bisánedje. Dát geađggit galget leat muitun israellaččaide agálaš áigái.’”

⁸ Israellaččat dahke nugo Josua gohčui. Sii válde gasku Jordana guoktenuppelohkái geađggi Israela čearddaid logu mielde, nugo Hearrá lei sárdnon Josuai. Sii gudde geđggiid idjadanbáikáseaset ja bidje daid dohko.

⁹ Josua ceggii guoktenuppelohkái geađggi gasku Jordana dan báikái gokko báhpat geat gudde lihtuárkka, ledje čužžon. Geađggit leat das vel otná beaivvige.

¹⁰ Báhpat geat gudde árkka, čužžo gasku Jordana dassážii go lei dahkkojuvvon buot maid Hearrá lei gohččon Josua sárdnut álbmogii. Nu ollašuvai maiddái dat gohččun maid Moses lei addán Josuai. Álbmot manai hoahpus Jordana rastá. ¹¹ Go buot earát ledje geargan mannamis rastá, de maiddái báhpat manne rastá ja guoddigohte Hearrá árkka álbmoga ovddas. ¹² Israellaččaid njunnošis soahtejoavkun manne Rubena ja Gada čearddat ja Manasse čeardabealle, nugo Moses lei gohččon sin. ¹³ Sullii njealljelogiduhát soahteolbmá vulge soahtat Hearrá muođuid ovddas Jeriko duolbadassii. ¹⁴ Dan beaivvi Hearrá dagai Josua stuorisin oppa Israela čalmmiin, ja sii gudnejahtte Josua buot su eallinbeivviid nugo ledje gudnejahttán Mosesa.

¹⁵ Hearrá celkkii Josuai: ¹⁶ “Gohčo báhpaid geat guddet lihtuárkka, goargŋut Jordanis gáddái.” ¹⁷ Josua dagai nu, ja báhpat gorgŋo Jordanis gáddái. ¹⁸ Dan seammás go báhpat geat gudde Hearrá lihtuárkka, ledje gorgŋon Jordanis gáddái ja lávken goikeeatnamii, de Jordana čázit máhcce fas ovddeš sadjáseaset ja dulve badjel buot gáttiid nugo ovdalge. ¹⁹ Israellaččat rasttildedje Jordana vuosttaš mánu logát beaivvi ja luoitaledje Gilgalii, Jeriko nuorttabeallái.

²⁰ Josua ceggii Gilgalii dan guoktenuppelohkái geađggi mat ledje váldojuvvon Jordanis. ²¹ Son dajai israellaččaide: “Go din mánát de muhtumin jerret iežaset áhčiin manin dát geađggit leat ceggejuvvon, ²² de galgabehtet dalle vástidit sidjiide: Israel manai goikeeatnama mielde Jordana rastá. ²³ Hearrá, din Ipmil, goikadii Jordana čáziid nugo son lei goikadan Ruksesmeara min ovddas, nu ahte min álbmot beasai rastá. ²⁴ Dan son dagai, vai buot eatnama álbmogat oahpašedje dovdat ahte Hearrá giehta lea gievra, ja vai dii álo balašeiddet Hearrás, din Ipmilis.”