Suddooaffar
1 Hearrá sártnui Mosesii:
2 Cealkke israellaččaide: Jos soamis fuomáškeahttá rihkku muhtun Hearrá báhkkoma ja dahká juoidá mii ii leat lobálaš, de sutnje gusket dát mearrádusat:
3 Jos vuidojuvvon báhppa sudduda ja dagaha álbmoga sivalažžan, de son galgá oaffaruššat Hearrái suddooaffarin nuorra vuovssá mii lea almmá vigi haga. 4 Son galgá doalvut vuovssá Hearrá muođuid ovdii almmustusgoađi uvssa lusa, bidjat gieđa dan oaivvi ala ja njuovvat dan Hearrá muođuid ovddas. 5 Vuidojuvvon báhppa galgá váldit veaháš vuovssávara ja doalvut dan almmustusgoahtái. 6 Son galgá buonjostit suorpma varas ja riškkuhit Hearrá muođuid ovddas vara čieža geardde bassibáikki ovdaloavdaga ovddabeallái. 7 Báhppa galgá maid sihkkut vara dan áltára čorvviide man alde njálggahájat suovvasat boldojuvvojit Hearrá muođuid ovddas almmustusgoađis. Dan vuovssávara mii báhcá, son galgá leiket boaldinoaffaráltára gurrii mii lea almmustusgoađi uvssa guoras. 8 Son galgá luvvet suddooaffarvuovssás buot buoiddi, sihke leavssusbuiddiid ja buot siskilušbuiddiid, 9 goappašiid maninčalmmiid ja buoiddi mii lea daid alde njárččáid guoras, ja stuorit vuoivvasgeaži mii luvvejuvvo oktan maninčalmmiiguin, 10 seammá láhkái go dat luvvejuvvojit searvevuođaoaffarvuovssás. Báhppa galgá boaldit daid boaldinoaffaráltára alde. 11 Vuovssá náhki ja bierggu, oaivvi ja julggiid, siskilušaid ja gubmuid, 12 oppa vuovssá, son galgá doalvut siidda olggobeallái buhtis báikái gosa oaffariid gunat leikejuvvojit, ja boaldit dan muoraid alde dolas. Dat galgá boldojuvvot dan báikkis gosa gunat leikejuvvojit.
13 Jos oppa Israela searvegoddi sudduda fuomáškeahttá ja rihkku dieđekeahttá Hearrá báhkkoma ja dahká juoidá mii ii leat lobálaš ja nu šaddá sivalažžan, 14 muhto dasto fuobmá iežas suttu, de searvegoddi galgá oaffaruššat suddooaffarin nuorra vuovssá. Sii galget doalvut dan almmustusgoađi lusa. 15 Searvegotti vuorrasat galget bidjat gieđaid vuovssá oaivvi ala Hearrá muođuid ovddas, ja vuoksá galgá goddojuvvot Hearrá muođuid ovddas. 16 Vuidojuvvon báhppa galgá váldit veaháš vuovssávara ja doalvut dan almmustusgoahtái. 17 Son galgá buonjostit suorpma varas ja riškkuhit dan Hearrá muođuid ovddas čieža geardde ovdaloavdaga ovddabeallái. 18 Son galgá maid sihkkut vara dan áltára čorvviide mii lea Hearrá muođuid ovddas almmustusgoađis. Dan vara mii lea báhcán, son galgá leiket boaldinoaffaráltára gurrii mii lea almmustusgoađi uvssa guoras. 19 Son galgá luvvet vuovssás buot buoiddi ja boaldit dan áltára alde. 20 Son galgá dahkat dainna vuovssáin seammá láhkái go suddooaffarvuovssáin. Go báhppa lea doaimmahan sidjiide soabahusa, de sii ožžot ándagassii. 21 Vuoksá galgá dolvojuvvot siidda olggobeallái ja boldojuvvot nugo ovddit vuokságe. Dát lea searvegotti suddooaffar.
22 Jos oaivámuš rihkku Hearrá, Ipmilis, báhkkoma ja fuomáškeahttá dahká juoidá mii ii leat lobálaš, muhto dasto fuobmá ahte lea sivalaš 23 dahje boahtá diehtit ahte lea suddudan, de son galgá buktit oaffarattáldahkan bohká mii lea almmá vigi haga. 24 Son galgá bidjat gieđa bohká oaivvi ala ja njuovvat dan Hearrá muođuid ovddas dan báikkis gos boaldinoaffareallit goddojuvvojit. Dat lea suddooaffar. 25 Báhppa galgá váldit suorpmain veaháš suddooaffara vara ja sihkkut dan boaldinoaffaráltára čorvviide ja leiket áltára gurrii dan vara mii lea báhcán. 26 Buot buoiddi son galgá boaldit áltára alde seammá ládje go searvevuođaoaffara buoiddige. Go báhppa lea doaimmahan soabahusa, de oaivámuš oažžu ándagassii.
27 Jos soamis álbmogis fuomáškeahttá rihkku Hearrá báhkkoma ja dahká juoidá mii ii leat lobálaš, muhto de fuobmá ahte lea sivalaš 28 dahje boahtá diehtit ahte lea suddudan, de son galgá buktit oaffarattáldahkan njiŋŋelas gáicca mii lea almmá vigi haga. 29 Son galgá bidjat gieđa suddooaffarealli oaivvi ala ja njuovvat dan boaldinoaffarsajis. 30 Báhppa galgá váldit suorpmain veaháš vara ja sihkkut dan boaldinoaffaráltára čorvviide. Dan vara mii báhcá, son galgá leiket áltára gurrii. 31 Son galgá luvvet buot buoiddi seammá ládje go buoidi luvvejuvvo searvevuođaoaffareallis. Báhppa galgá boaldit dan áltára alde hádjan mii lea Hearrá miela mielde. Go báhppa lea doaimmahan soabahusa, de dat gii lea rihkkon, oažžu ándagassii.
32 Jos muhtin buktá suddooaffarin lábbá, de dat galgá leat njiŋŋelas almmá vigi haga. 33 Son galgá bidjat gieđa suddooaffarealli oaivvi ala ja njuovvat dan suddooaffarin dan báikkis gos boaldinoaffareallit njuvvojuvvojit. 34 Báhppa galgá váldit suorpmain veaháš suddooaffarealli vara ja sihkkut dan boaldinoaffaráltára čorvviide. Dan vara mii báhcá, son galgá leiket áltára gurrii. 35 Son galgá luvvet buot buoiddi seammá láhkái go sávzzabuoidi luvvejuvvo searvevuođaoaffaris. Báhppa galgá boaldit dan áltára alde oktan Hearrá dollaoaffariiguin. Go báhppa lea doaimmahan soabahusa, de dat gii lea rihkkon, oažžu ándagassii.