Jesus várre guoktilašvuođas
1 Dan botta eatnat duhát olbmot ledje čoagganan, nu ahte sii goasii dulbme guhtet guimmiideaset. Jesus sárdnugođii ovddimustá máhttájeddjiidasas: “Váruhehket farisealaččaid suvrradáiggis, guoktilašvuođas. 2 Ii leat mihkkege čiegáid mii ii boađe albmosii, ii mihkkege čihkkojuvvon mii ii šatta diehttevassii. 3 Danin dat maid dadjabehtet seavdnjadasas, boahtá gullosii beaivečuovggas, ja dat maid gámmáris savkalehpet nuppi olbmo bealljái, gulahuvvo dáhkiid alde.
Allet bala!
4 Mun cealkkán didjiide, ustibiiddásan: Allet bala sis geat goddet rupmaša, muhto das maŋŋil eai veaje dahkat duođi eambbo. 5 Gullet, geas dii galgabehtet ballat: Ballet sus geas lea fápmu goddit ja dasto bálkestit helvehii. Duođaid, mun cealkkán didjiide: Ballet sus! 6 Almma vihtta cizáža vuvdojuvvojit guovtti skillegii? Dattetge Ipmil ii leat vajáldahttán dain ovttage. 7 Velá juohke vuoktačalbmige din oaivvis lea lohkkojuvvon. Allet bala, dii lehpet mávssoleappot go eatnat cizážat.
8 Mun cealkkán didjiide: Gii dovddasta mu olbmuid ovddas, dan Olbmobárdnige dovddasta Ipmila eŋgeliid ovddas. 9 Muhto gii biehttala mu olbmuid ovddas, dat biehttaluvvo Ipmila eŋgeliid ovddas. 10 Ja juohkehažžii gii dadjá juoidá Olbmobártni vuostá, addojuvvo ándagassii, muhto dasa gii bilkida Bassi Vuoiŋŋa, ii ándagassii addojuvvo. 11 Go dii dolvojuvvobehtet synagogaide ja ráđđejeddjiid ja eiseválddiid ovdii, de allet dalle leage morrašis das maid sárdnubehtet dahje mo bealuštehpet iežadet. 12 Go dat boddu boahtá, de Bassi Vuoigŋa neavvu didjiide maid galgabehtet dadjat.”
Rikkis olmmái
13 Muhtun olmmái olbmuid gaskkas dajai Jesusii: “Oahpaheaddji, gohčo mu vielja juogadit árbbi muinna.” 14 Muhto Jesus jearai: “Leango mun biddjojuvvon din duopmárin dahje árbejuogadeaddjin?” 15 Ja son celkkii sidjiide: “Váruhehket buotlágán ruhtaváibmilvuođas. Ii olbmo eallin čuoččo opmodagas, vaikko dat livččii man valjis.”
16 Ja son muitalii sidjiide veardádusa: “Lei rikkis olmmái gean eanan lei addán buori šattu. 17 Son jurddašii: ‘Maid mun dál dagan? Mu šaddu ii čága šat gosage.’ 18 Son dajai: ‘Dán mun dagan: Mun gaikkun áittiidan ja huksen daid sadjái stuoribuid. Daidda mun rájan oppa šattu ja buot iežan opmodaga. 19 De mun dajan alccesan: Dál don leat rádjan ollu buriid máŋgga jahkái. Vuoiŋŋas dál, bora, juga ja leage ilus!’ 20 Muhto Ipmil celkkii sutnje: ‘Don jierpmeheapme! Otná ija du siellu gáibiduvvo dus ruoktot. Ja buot maid leat čohkken – gii dan oažžu?’
21 Ná geavvá dasa gii čohkke riggodaga alccesis, muhto geas ii leat dávvir Ipmila luhtte.”
Allet ane morraša!
22 Jesus celkkii máhttájeddjiidasas:
Danne mun cealkkán didjiide: Allet moraš heakkadet dihte, maid borrabehtet, alletge rupmaša dihte, mainna dan bivttastehpet. 23 Heagga lea eambbo go borramuš ja rumaš eambbo go biktasat. 24 Gehččet gáranasaid: Eai dat gilvve eaige láddje, ii dain leat áiti iige vuorká, muhto Ipmil biebmá daid. Diihan lehpet ollu eambbo veara go lottit! 25 Guhtemuš dis sáhttá moraštemiin lasihit ovttage állana iežas eallinahkái? 26 Go dii dalle ehpet veaje dán uhccánaččage, de manne dii váivvidehpet iežadet buot eará áššiin? 27 Gehččet liđiid, mo dat šaddet: Eai dat bargga eaige bane. Mun cealkkán didjiide: Ii Salomoge buot hearvásvuođastis lean gárvvuhuvvon nugo okta dain. 28 Go Ipmil ná bivttasta gietti rási mii odne ceaggá ja ihttin bálkestuvvo ommanii, de almma son bivttasta dinge, dii uhccán oskkolaččat!
29 Allet jurddaš mo dii fidnebehtet borramuša ja juhkamuša. Allet dan oza. 30 Buot daid háhpohallet máilmmi olbmot, muhto din Áhčči diehtá ahte dii daid dárbbašehpet. 31 Ohcet baicca su riikka, de maiddái buot dát didjiide addojuvvojit. 32 Ale bala, mu uhca eloš! Dasgo din Áhčči lea mearridan addit didjiide riikka.
33 Vuvdet mii dis lea, ja addet gefiide. Rábidehket alcceseattet burssaid mat eai gola, čohkkejehket albmái dávvira mii ii noga. Dohko suola ii beasa ja doppe muohcu ii bilit. 34 Gos din dávvir lea, doppe viggá leat maiddái din váibmu.
Bálvaleaddji gii lea gárvvis
35 Lehkoset din alimat boahkánastojuvvon ja din lámppát buollimin. 36 Lehket nugo bálvaleaddjit geat vurdet hearráset ruoktot heajain, gearggusin rabastit sutnje uvssa dallánaga go son boahtá ja goalkkuha. 37 Ávdugasat dat bálvaleaddjit geaid sin hearrá gávdná gohcimin dalle go boahtá! Duođaid, mun cealkkán didjiide: Son boahkánastá iežas, bovde sin beavdái ja bálvala sin ieš. 38 Jos son boahtá easkka nuppi dahje goalmmát idjagohcinvuoru ja gávdná sin gárvvisin, de ávdugasat leat dat bálvaleaddjit.
39 Muhto dihtet dán: Jos dáluisit dieđášii goas suola boahtá, de son ii divttáše su gaikut vissosis. 40 Lehket maiddái dii gárvásat, danin go Olbmobárdni boahtá dalle go ehpet gátte.
41 Peter jearai: “Hearrá, guoskágo dát veardádus buohkaide vai dušše midjiide?” 42 Hearrá vástidii:
“Gii dalle lea oskkáldas ja jierpmálaš dállodoalli gean su hearrá bidjá bearráigeahččat bálvaleddjiid ja addit sidjiide borramuša vuogas áigái? 43 Ávdugas dat bálvaleaddji gean su hearrá gávdná dahkamin maid galgá, go son máhccá! 44 Duođaid, mun cealkkán didjiide: Su háldui hearrá oskkilda oppa opmodagas. 45 Bálvaleaddji sáhttá jurddašit: ‘Mu hearrá ádjána boahtimis!’ De son riepmá cábmit bálvváid ja bálvánieiddaid ja borrat, juhkat ja juhkaluvvat. 46 Muhto dan beaivvi go bálvaleaddji ii leat vuordimin, dan bottu maid son ii dieđe, su hearrá boahtá ja časká su jámas, ja nu bálvaleaddji oažžu seammá oasi go dat geat eai oskko. 47 Jos bálvaleaddji diehtá maid su hearrá dáhttu, muhto ii dattetge ráhkkan iige daga su dáhtu mielde, son oažžu máŋga časkkástaga. 48 Muhto jos bálvaleaddji diehtemeahttunvuođas dahká dakkára mii ráŋggáštuvvo časkkástagaiguin, de son oažžu uhccán časkkástagaid.
Geasa ollu lea addojuvvon, das ollu ohccojuvvo, ja geasa ollu lea oskkilduvvon, das ollu gáibiduvvo.
Ii ráfi, muhto soahpameahttunvuohta
49 Dola mun lean boahtán suhppet eatnama ala. Vare dat livččii juo buollán! 50 Muhto mun ferten gásttain gásttašuvvot, ja mun áŧestuvan dassážii go lean dan čađahan. 51 Gáddibehtetgo ahte mun lean boahtán buktit eatnama ala ráfi? Mun cealkkán didjiide, in ráfi, muhto soahpameahttunvuođa. 52 Dás maŋás ovtta bearraša olbmot ellet soahpameahttunvuođas: Vihttasis leat golmmas guoktása ja guovttis golbmasa vuostá, 53 áhčči šaddá vuostálaga bártniinis ja bárdni áhčiinis, eadni nieiddainis ja nieida etniinis, vuoni manjiinis ja mannji vuotnámiinnis.”
Áiggi mearkkat
54 Jesus celkkii dasto olbmuide: “Go oaidnibehtet balvva badjáneamen oarjjil, de dii dadjabehtet dallánaga: ‘Dál šaddá arvi’, ja nu šaddá. 55 Ja go lullebiegga bossu, de dii dadjabehtet: ‘Dál šaddá báhkka’, ja nu šaddá. 56 Dii guoktilaččat! Eatnama ja almmi hámi dii gal máhttibehtet lohkat, manne dalle ehpet máhte lohkat dán áiggi?
57 Manne ehpet ieža gávnnat mii lea riekta? 58 Go don vuostebeliinat leat mannamin riektái, de bargga áŋgirit soabadit suinna juo mátkkis. Muđui son geassá du duopmára ovdii, ja duopmár addá du riektebálvvá gihtii gii bidjá du giddagassii. 59 Mun cealkkán dutnje: Doppe it beasa ovdal go leat máksán velá maŋimuš evrrege.”