Guollesálaš. Vuosttaš máhttájeaddjit
1 Go Jesus muhtun beaivvi lei čuožžumin Gennesaretjávrri gáttis ja olbmot bahkkejedje sutnje vai besset gullat Ipmila sáni, 2 de son oinnii jávregáttis guokte fatnasa. Bivdit ledje mannan dain eret ja ledje doidimin firpmiideaset. 3 Jesus manai nuppi fatnasii, mii gulai Simonii, ja dáhtui su sirdit veaháš gáttis eret. De son čohkánii ja oahpahii olbmuid fatnasis.
4 Go Jesus lei geargan sárdnumis, de son celkkii Simonii: “Suhket fávlái ja suhppot firpmiid.” 5 Simon vástidii: “Oahpaheaddji, mii leat bargan geažos ija eatge leat ožžon maidege. Muhto mun suhppen vel fierpmi, go don gohčut.” 6 Sii dahke nu ja fidnejedje nu stuorra guollehivvodaga ahte sin fierbmi gaikánišgođii. 7 Sii sevve guimmiideaset geat ledje nuppi fatnasis, boahtit veahkkin. Sii bohte ja devde goappašiid fatnasiid nu ahte dat goasii vudjo. 8 Go Simon Peter dan oinnii, de son luoitádii Jesusa julggiid ovdii ja dajai: “Hearrá, mana eret mu luhtte! Mun lean suttolaš olmmái.” 9 Stuorra sálaš lei hirpmástuhttán su ja buohkaid geat ledje suinna, 10 nu maiddái Sebedeusa bártni guoktá Jakoba ja Johannesa geat leigga Simona bivdoguoimmit. Muhto Jesus celkkii Simonii: “Ale bala. Dás maŋás don bivddát olbmuid.” 11 De sii suhke gáddái, guđđe buot ja čuvvo Jesusa.
Jesus buorida spihtálačča
12 Go Jesus lei muhtun gávpogis, de su lusa bođii olmmái gii lei áibbas spihtálnaga. Go son oinnii Jesusa, de son luoitádii su ovdii muđolassii ja ánuhii: “Hearrá! Jos don dáhtut, de don veaját buhtistit mu.” 13 Jesus geigii gieđa, guoskkahii su ja celkkii: “Mun dáhtun. Šatta buhtisin.” Dallánaga spihtáldávda jávkkai. 14 Jesus gilddii su muitaleames dan geasage ja celkkii: “Mana čájehit iežat báhppii ja oaffaruša buhtástusastat oaffara, nugo Moses lea gohččon, duođaštussan sidjiide.” 15 Jesusa beaggin viidánii ain, ja ollu olbmot čoahkkanedje gullat su ja buoriduvvot buohcuvuođaineaset. 16 Muhto son manai ávdin báikkiide rohkadallat.
Jesus buorida lámis olbmá
17 Go Jesus muhtun beaivvi fas oahpahii, de muhtun farisealaččat ja láhkaoahpaheaddjit čohkkájedje guldaleamen su. Sii ledje boahtán buot Galilea giliin, Judeas ja Jerusalemis. Jesusis váikkuhii Hearrá fápmu, nu ahte son sáhtii buoridit. 18 Muhtun olbmát gudde dohko guoddinseaŋggas lámis olbmá. Sii vigge buktit su sisa ja bidjat Jesusa ovdii. 19 Muhto olbmuid eatnatvuođa dihte sii eai goit sáhttán buktit su sisa, ja nu sii gorgŋo dáhki ala, luvvejedje diillaid ja luite buohcci oktan guoddinseaŋggain aiddo Jesusa ovdii. 20 Go Jesus oinnii sin oskku, de son celkkii: “Ustiban, du suttut leat addojuvvon ándagassii.” 21 Dalle čáloahppavaččat ja farisealaččat jurddašedje: “Mii olbmáid dát lea? Sonhan bilkida Ipmila. Gii sáhttá addit suttuid ándagassii earret Ipmila?” 22 Jesus diđii maid sii jurddašedje ja celkkii sidjiide: “Maid dii jurddašehpet váimmusteattet? 23 Goappá lea álkit dadjat: ‘Du suttut leat addojuvvon dutnje ándagassii’, vai dadjat: ‘Lihka ja vázzil’? 24 Muhto vai diehtibehtet ahte Olbmobártnis lea váldi eatnama alde addit suttuid ándagassii” – ja son sártnui lámis olbmái – “mun cealkkán dutnje: Čuožžil, váldde seaŋggat ja mana ruoktot.” 25 Ja dallánaga olmmái čuožžilii buohkaid oaidnut, válddii seaŋgga maid alde lei veallán, vulggii ruoktot ja máinnui Ipmila. 26 Buohkat hirpmástuvve ja máidno Ipmila. Balus sii dadje: “Odne mii leat oaidnán dakkára mii ii leat jáhkkimis.”
Jesus rávká Levi
27 Dasto Jesus vulggii doppe ja oinnii Levi-nammasaš tuollára čohkkámin tuolloviesu olggobealde. Jesus celkkii sutnje: “Čuovo mu!” 28 Levi guđii visot, čuožžilii ja čuovui Jesusa.
29 Levi ráhkadii dasto Jesusii stuorra guossemállásiid iežas viesus, ja ollu tuollárat ja earrásat ledje boradeamen sudnuin. 30 Muhto farisealaččat ja čáloahppavaččat geat gulle sidjiide, nimmorišgohte ja dadje Jesusa máhttájeddjiide: “Manne dii boradehpet ja juhkabehtet tuolláriiguin ja suttolaččaiguin?” 31 Jesus vástidii sidjiide: “Eai dearvvaš olbmot dárbbaš dálkkasteaddji, muhto buohccit. 32 In mun leat boahtán rávkat vanhurskásiid, muhto suttolaččaid, vai sii jorgalit.”
Headjaguossit eai fástut
33 Sii dadje Jesusii: “Johannesa máhttájeaddjit fástudit dávjá ja rohkadallet, nu maiddái farisealaččaid máhttájeaddjit, muhto du máhttájeaddjit borret ja juhket.” 34 Son vástidii: “Oaččuhehpetgo dii headjagussiid fástudit dalle go irgi lea ain sin luhtte? 35 Muhto boahtá áigi go irgi váldojuvvo sin luhtte eret, ja dalle sii fástudit.”
36 Jesus muitalii vel sidjiide veardádusa: “Ii oktage váldde bihtá ođđa biktasis ja bija dan duokŋasin boares biktasii. Dasgo dalle ođđa bivttas gaikána, iige duokŋasge mii lea váldojuvvon ođđa biktasis, heive boares biktasii. 37 Iige oktage leike varas viinni boares viidneseahkaide. Dasgo dalle varas viidni ludde boares viidneseahkaid, viidni golgá eatnamii ja viidneseahkat billašuvvet. 38 Varas viinni galgá baicca leiket ođđa viidneseahkaide. 39 Ii oktage gii lea juhkan boares viinni, hálit varas viinni. Son atná boares viinni buorebun.”