Veardádus gilvi birra
1 Seammá beaivvi Jesus vulggii olggos, manai jávregáddái ja čohkánii. 2 Su lusa čoahkkanedje dalle nu ollu olbmot ahte son fertii mannat fatnasii. Son čohkkái fatnasis, ja olbmot čužžo jávregáttis, 3 ja son sártnui sidjiide guhká veardádusaiguin ja celkkii:
“Gilvi vulggii gilvit. 4 Ja go son gilvvii, de muhtun gilvagat gahčče geaidnogurrii, ja lottit bohte ja borre daid. 5 Muhtun gilvagat gahčče geađgás eatnamii mas ii lean ollu muolda. Dat ihte johtilit, dainna go dakko ii lean assás eanan, 6 muhto go beaivváš badjánii, de dat bulle ja goldne, danin go dain ii lean ruohtas. 7 Muhtun gilvagat gahčče bastilislánjáid gaskii, ja bastilislánját šadde ja hávkadedje daid. 8 Muhto muhtun gilvagat gahčče buori eatnamii ja šaddadedje šattu, čuođigeardásaš, guhttalogigeardásaš ja golbmalogigeardásaš šattu. 9 Geas leat bealjit, dat gullos!”
Veardádusaid mearkkašupmi
10 Máhttájeaddjit bohte su lusa ja jerre: “Manne don sártnut olbmuide veardádusaiguin?” 11 Son vástidii: “Danin go dii lehpet beassan diehtit almmi riikka čiegusvuođaid, muhto sii eai. 12 Geas lea, dasa addojuvvo, ja son oažžu valljugasat, muhto geas ii leat, das váldojuvvo eret velá datge mii sus lea. 13 Mun sártnun sidjiide veardádusaiguin, dasgo sii oidnet eaige dattetge oainne ja gullet eaige dattetge gula eaige ádde. 14 Nu ollašuvvá Jesaja profehtasátni sidjiide: Dii gullabehtet muhto ehpet ipmir, dii oaidnibehtet muhto ehpet ádde. 15 Dasgo dán álbmoga váibmu lea buššon. Illá sii gullet beljiiguin, ja čalmmiid sii leat čárven, nu ahte eai oainne čalmmiiguin eaige gula beljiiguin eaige ádde váimmuin eaige jorgal nu ahte mun beasan buoridit sin. 16 Muhto ávdugasat leat din čalmmit mat oidnet ja din bealjit mat gullet. 17 Duođaid, mun cealkkán didjiide: Ollu profehtat ja vanhurskásat leat áibbašan oaidnit dan maid dii oaidnibehtet, muhto eai leat beassan oaidnit, ja gullat dan maid dii gullabehtet, muhto eai leat beassan gullat.
Jesus čilge veardádusa gilvi birra
18 Gullet dál maid veardádus gilvi birra mearkkaša. 19 Álo go muhtun gullá sága riikka birra iige ádde dan, de boahtá Bahá ja gaiku eret dan mii lea gilvojuvvon su váibmui. Dát lea dat mii gilvojuvvui geaidnogurrii. 20 Dat mii gilvojuvvui geađgás eatnamii, lea son gii váldá sáni vuostá iluin dalán go gullá dan, 21 muhto go sus ii leat ruohtas, de son bissu dušše muhtun áiggi. Go dasto boahtá áŧestus ja doarrádallojupmi sáni dihte, de son jorrala dallánaga. 22 Dat mii gilvojuvvui bastilislánjáid gaskii, lea dat gii gullá sáni, muhto geas sátni ii atte šattu, danin go dán máilmmi fuolat ja riggodaga fillehus hávkadit dan. 23 Muhto dat mii gilvojuvvui buori eatnamii, lea son gii gullá sáni ja ádde dan ja šaddada šattu: čuođigeardásaš, guhttalogigeardásaš ja golbmalogigeardásaš šattu.”
Veardádus árvvohis rásiid birra
24 Jesus muitalii sidjiide nuppi veardádusa: “Almmi riika lea dego olmmái gii gilvvii beldosis buriid gilvagiid. 25 Muhto go buohkat ledje oađđimin, de bođii su vašálaš, gilvvii nisuid gaskii árvvohisrásiid ja manai eret. 26 Go rásit ihte ja dahkagohte gordneoivviid, de ihte maiddái árvvohisrásit. 27 Bálvaleaddjit manne dalle isideaset lusa ja jerre: ‘Hearrá, almma don gilvet beldosat buriid gilvagiid? Gos dasa de leat boahtán árvvohisrásit?’ 28 Isit vástidii: ‘Vašálaš lea dan dahkan.’ Bálvaleaddjit jerre: ‘Dáhtutgo ahte mii mannat gaikut daid eret?’ 29 Son vástidii: ‘In, danin go dii veadjibehtet oktanaga árvvohisrásiiguin gaikut nisuidge. 30 Diktet goappašagaid šaddat gitta láddjenáiggi rádjái. Go láddjenáigi boahtá, de mun cealkkán ládjobargiide: Gaikot vuos árvvohisrásiid ja čatnet gihppun boaldima várás, muhto nisuid čohkkejehket mu áitái.’”
Sennetsiepman
31 Son muitalii sidjiide nuppi veardádusa: “Almmi riika lea dego sennetsiepman maid olmmái gilvvii beldosis. 32 Dat lea uhcit go buot eará siepmanat, muhto go dan ihtu lea šaddan stuorisin, de dat lea stuorit go eará urtasat. Maŋimuš dat lea dego muorra, nu ahte almmi lottit bohtet ja dahket besiid dan ovssiide.”
Suvrradáigi
33 Son muitalii sidjiide vel nuppi veardádusa: “Almmi riika lea suvrradáiggi láhkásaš maid nisson soatká golmma mihtu jáffuid sisa, ja de suvru buot.”
34 Buot dáid Jesus sártnui olbmuide veardádusaiguin. Almmá veardádusaid haga son ii sárdnon sidjiide maidege, 35 vai ollašuvvá dat mii lea celkojuvvon profehta bokte: Mun rabastan njálmmi ja sártnun veardádusaiguin, mun almmuhan dan mii lea leamaš čihkosis máilmmi sivdnideami rájes.
Jesus čilge veardádusa árvvohis rásiid birra
36 Dasto Jesus luittii olbmuid mannat. Go son lei boahtán vissui, de máhttájeaddjit bohte su lusa ja dadje: “Čilge midjiide veardádusa bealddu árvvohis rásiid birra.” 37 Son vástidii sidjiide: “Dat gii gilvá buriid gilvagiid, lea Olbmobárdni. 38 Bealdu lea máilbmi. Buorit gilvagat leat riikka mánát, ja árvvohisrásit leat bahágasa mánát. 39 Vašálaš mii gilvvii árvvohisrásiid, lea Sáhtán. Gordneládju lea máilmmi loahppa, ja ládjobargit leat eŋgelat. 40 Nugo árvvohisrásit čohkkejuvvojit ja boldojuvvojit dolas, nu geavvá máilmmi loahpasge. 41 Olbmobárdni vuolggaha eŋgeliiddis, ja sii čohkkejit su riikkas buohkaid geat jorralahttet earáid ja dahket vearrivuođa. 42 Eŋgelat bálkestit sin buolli ommanii. Doppe sii čirrot ja gižahit bániid. 43 Muhto vanhurskásat báitet dalle Áhčiset riikkas dego beaivváš. Geas leat bealjit, dat gullos!
Dávvir, bearral ja nuohtti
44 Almmiriika lea dego dávvir mii lei čihkkojuvvon beldui. Olmmái gávdná dan ja čiehká dan fas eatnamii, ja ilus son vuolgá ja vuovdá buot mii sus lea ja oastá dan bealddu.
45 Almmiriika lea maiddái dego gávpeolmmái gii lea ohcamin čáppa bearraliid. 46 Go son gávdná divrras bearrala, de son vuovdá buot mii sus lea, ja oastá dan.
47 Almmiriika lea maiddái dego nuohtti mii suhppojuvvo jávrái ja bivdá buotlágán guliid. 48 Go dat lea dievvan, de bivdit gesset dan gáddái, čohkánit ja čohkkejit buriid guliid goriide, muhto bálkestit fuones guliid. 49 Nu geavvá máilmmi loahpas: Eŋgelat vulget, čuldet baháid vanhurskásiid searvvis 50 ja bálkestit sin buolli ommanii. Doppe sii čirrot ja gižahit bániid.
51 Lehpetgo dal ádden buot dán?” Sii vástidedje: “De leat.” 52 Dalle son celkkii sidjiide: “Danne lea juohke čáloahppavaš gii lea šaddan almmi riikka máhttájeaddjin dego dáluisit gii buktá ovdan vuorkkástis ovdan sihke ođđasa ja boarrása.”
Jesus ii váldojuvvo vuostá iežas ruovttugávpogis
53 Go Jesus lei muitalan dáid veardádusaid, de son vulggii doppe 54 ja manai ruovttugávpogasas. Son oahpahii olbmuid sin synagogas, nu ahte sii ovddošedje ja jerre: “Gos boahtá dán olbmo viisodat, gos dan fápmu dahkat oavdudaguid? 55 Almma son lea dat snihkkára bárdni? Almma su eatni namma lea Maria, ja Jakob, Josef, Simon ja Judas leat su vieljat? 56 Su oappát maid ásset dáppe gos miige. Gos lea son ožžon buot dán?” 57 Ja sii vearránedje sus. Muhto Jesus celkkii sidjiide: “Ii mange eará báikkis profehta badjelgehččojuvvo nugo iežas ruovttugávpogis ja iežas ruovttus.” 58 Ja go sii eai dáhtton oskut sutnje, de son ii dahkan doppe eatnat veagalaš daguid.