Velggiid luoitin
1 Eatnat olbmát ja nissonat moite garrasit juvddálaš vieljaideaset. 2 Muhtumat dadje: “Mii šaddat bidjat bártniideamet ja nieiddaideamet pántan vai oažžut láibegortni borrat ja bissut heakkas.” 3 Soapmásat dadje: “Mii leat bidjan iežamet eatnamiid, viidnegárddiid ja viesuid pántan, vai fidnet láibegortni eatge nealggo.” 4 Earátgis dadje: “Mii leat ferten váldit loanas ruđa min bealdduid ja viidnegárddiid vuostá, vai beassat máksit vearu gonagassii. 5 Mii leat seammá oažži ja varra go min vieljat, ja min mánát leat seammá buorit go sin mánát. Dattetge mii šaddat vuovdit bártniideamet ja nieiddaideamet šlávvan, ja muhtumat min nieiddain leat juo vuvdojuvvonge. Mii leat vuoimmeheamit, min bealddut ja viidnegárddit gullet earrásiidda.”
6 Go mun gullen sin váidalusa, de mun moaráhuvven sakka. 7 Mun guorahallen ášši dárkilit, ja de mun cuiggodin hearráid ja oaivámuččaid. Mun jerren sis: “Bearrabehtetgo dii vealggi iežadet vieljain?” De mun rávken čoahkkái stuorra čoakkalmasa sin vuostá 8 ja dadjen: “Mii leat oastán friddjan min juvddálaš vieljaideamet geat ledje vuvdojuvvon eará álbmogiidda, nu ollu go leat sáhttán. Vuovdibehtetgo dii iežadet vieljaid, nu ahte mii šaddat oastit sin fas friddjan?” Sii orro jávohaga eaige máhttán vástidit. 9 Mun dadjen vel: “Ii leat buorre maid dii dahkabehtet. Dii galggašeiddet vádjolit Ipmila dáhtu mielde vai dat álbmogat mat leat min vašálaččat, eai beasa hiddjidit min. 10 Mun ja mu vieljat ja mu olbmát leat maiddái lonen sidjiide ruđa ja láibegortni. Luitot sidjiide dan vealggi! 11 Máhcahehket sidjiide odne sin iežaset bealdduid, viidnegárddiid, oliivagárddiid ja viesuid, alletge gáibit sis dan ruđa, gortni, viinni ja oljju maid sii leat didjiide velggolaččat.” 12 Sii vástidedje: “Mii máhcahit visot eatge gáibit maidege. Mii dahkat nugo don dajat.” De mun bovdejin dasa báhpaid, ja sin gullut mun vuortnuhin sin dahkat nugo sii ledje lohpidan. 13 Mun savdnjen velá eret dan mii mus lei ozas ja dadjen: “Ná Ipmil savdnjos juohkehačča eret iežas viesus ja opmodagas gii ii doala dán lohpádusa. Šaddos dakkár olmmoš nu savdnjojuvvon ja guorusin.” Oppa čoagganeapmi dajai “amen” ja máinnui Hearrá. Ja sii dolle lohpádusaset.
Nehemja eatnanhearrán
14 Dan beaivvi rájes go mun nammaduvvojin Juda eatnanhearrán, gonagas Artaxerxesa guoktelogát ráđđenjagi rájes gitta su golbmaloginuppi ráđđenjagi rádjái, oktiibuot guoktenuppelohkái jagi, de in mun eaige mu olbmát gáibidan dan eallámuša mii livččii gullan eatnanhearrái. 15 Ovddit eatnanhearrát ledje bidjan álbmogii lossa nođiid ja váldán sis njealljelogi šekela silbba beaivvis láibbi ja viinni várás, ja sin bálvaleaddjit lávejedje vuortnuhit álbmoga. Muhto mun in dahkan nu, dasgo mun ballen Ipmilis.
16 Dasto mun ledjen vel huksemin muvrra, vaikko mus ii lean eanan, ja buot mu olbmátge ledje dan barggus. 17 Mu beavddis borre čuođivihttalogi hearrá ja oaivámučča, ja mu beavddis borre maid guossit geat ledje boahtán min lusa birasálbmogiin. 18 Juohke beaivvi ráhkaduvvui biebmun okta vuoksá, guhtta buoremusšlájat sávzza ja lottit, ja juohke logát beaivvi buktojuvvui ollu viidni. Buot dáid mun máksen ieš. Dattetge mun in gáibidan dan eallámuša mii gulašii eatnanhearrái, dasgo bargu lei lossa noađđi álbmogii.
19 Ipmilan, ale vajálduhte maid mun lean dahkan dán álbmoga ávkin!