Njealját Mosesgirji

Kanaana ráját

¹ Hearrá sártnui Mosesii: ² Atte israellaččaide dán gohččuma. Dii boahtibehtet dál Kanaanii, dan eatnamii maid oažžubehtet oapmineattet. Dát leat Kanaana eatnama ráját:

³ Lullin din eatnama rádjá manná Sinmeahcis Edoma guora. Dát rádjá álgá nuortin Jápmameara lulágeažis, ⁴ gávvá de Akrabbimgorgŋehaga guvlui ja manná dan lulábeali Sina bokte Kadeš Barnea lulábeallái. Doppe rádjá manná Hasar-Addarii ja Asmonii, ⁵ gávvá de Egypta rádjejoga guvlui ja dan mielde merrii. ⁶ Oarjin din rádjá lea Gaskamearra. Dat lea din oarjerádjá. ⁷ Dát lea din davverádjá: Merkejehket rájá Gaskamearas Horvárrái, ⁸ Horváris Lebo-Hamatii doppe Sedadii. ⁹ Doppe rádjá manná Sifronii ja ain Hasar-Enana rádjái. Dat lea din davverádjá. ¹⁰ Nuortarájá dii galgabehtet merket Hasar-Enanis Šefamii ¹¹ gokko rádjá manná vulos Riblai, Ajina nuorttabeallái ja doppe ain Gennesaretjávregátti nuorttabeale várrevieltái. ¹² Doppe rádjá manná Jordanii ja dan mielde Jápmamerrii.

Dát lea din eanan, ja dát leat dan ráját.

¹³ Moses attii israellaččaide dán gohččuma: “Dát lea dat eanan maid galgabehtet juogadit gaskkaneattet vuorbádemiin. Hearrá lea gohččon addit dan ovcci čerdii ja ovtta čeardabeallái, ¹⁴ dasgo Rubena ja Gada čearddaid ja Manasse čeardabeale bearrašat leat juo ožžon iežaset oasi eatnamis. ¹⁵ Dát guokte čeardda ja okta čeardabealle leat juo ožžon opmodagaset Jordana nuorttabealde Jeriko buohta.”

¹⁶ Hearrá sártnui Mosesii:

¹⁷ Dát guovttos, báhppa Elasar ja Josua, Nuna bárdni, leaba dat olbmát geat galgaba juogadit didjiide eatnama. ¹⁸ Dán bargui galgabehtet váldit vel oaivámučča guđege čearddas. ¹⁹ Dát leat dat olbmát: Juda čearddas Kaleb, Jefunne bárdni, ²⁰ Simeona čearddas Samuel, Ammihuda bárdni, ²¹ Benjamina čearddas Elidad, Kislona bárdni, ²² Dana čearddas oaivámuš Bukki, Jogli bárdni, ²³ Josefa bártni Manasse čearddas oaivámuš Hanniel, Efoda bárdni, ²⁴ ja Efraima čearddas oaivámuš Kemuel, Šiftana bárdni, ²⁵ Sebulona čearddas oaivámuš Elisafan, Parnaka bárdni, ²⁶ Isaskara čearddas oaivámuš Paltiel, Assana bárdni, ²⁷ Ašera čearddas oaivámuš Ahihud, Šelomi bárdni, ²⁸ ja Naftali čearddas oaivámuš Pedahel, Ammihuda bárdni.

²⁹ Dáid olbmáid Hearrá mearridii juogadit opmodaga israellaččaide Kanaana eatnamis.