Njealját Mosesgirji

Nieiddaid árbenvuoigatvuohta

¹ Josefa náli olbmo Gileada, Makira bártni, Manasse áddjuba, bearašoaivámuččat bohte Mosesa ja Israela čearddaid oaivámuččaid ovdii ² ja dadje: “Hearrá gohčui du juogadit vuorbádemiin eatnama opmodahkan israellaččaide. Hearrá lea maid gohččon du addit vielljamet Selofhada árbbi su nieiddaide. ³ Muhto jos sii náitalit israellaččain gii gullá eará čerdii, de sin árbeoassi sirdašuvvá eret min áhčiid opmodagas ja laktása dan čeardda opmodahkii masa sii šaddet gullat. Dat oassi váldojuvvo eret min opmodagas. ⁴ Dalle go Israelis lea ávvujahki, de nieiddaid árbeoassi laktojuvvo bissovaččat dan čeardda opmodahkii masa sii leat šaddan gullat, ja dalle oassi mii lea addojuvvon sidjiide, lea gaikkihuvvon eret min áhčiid čeardda opmodagas.”

⁵ Hearrá gohččuma mielde Moses dajai israellaččaide:

Josefa náli čearda lea vuoigadis. ⁶ Ná Hearrá lea mearridan Selofhada nieiddaid áššis: Sii ožžot náitalit geainna hálidit, go beare náitalit dakkár sohkii mii gullá sin áhči čerdii. ⁷ Israellaččaid eanan ii oaččo sirdašuvvat čearddas nubbái, muhto buohkat galget doallat gitta iežaset čeardda opmodagas. ⁸ Dan dihte nieida gii árbe áhčis opmodaga, galgá náitalit olbmáin gii gullá su áhčiid čeardda sohkii. Ná juohke israellaš beassá doallat áhčiidis opmodaga. ⁹ Eanan ii oaččo sirdašuvvat čearddas nubbái, muhto juohke Israela čearda beassá doallat gitta iežas opmodagas.

¹⁰ Selofhada nieiddat dahke nugo Hearrá lei gohččon Mosesa. ¹¹ Selofhada nieiddat Mahla, Tirsa, Hogla, Milka ja Noa náitaledje áhčiset vieljaid bártniiguin. ¹² Sii náitaledje Josefa bártni Manasse sohkii, ja sin opmodat bisui dan čearddas masa sin áhčiid sohka gulai.

¹³ Dát leat dat báhkkomat ja mearrádusat maid Hearrá attii Mosesa bokte israellaččaide Moaba duolbadasain, Jordangáttis, Jeriko buohta.