Ane viisodaga árvvus!
1 Gullet, mánáidan, áhči neavvagiid,
guldalehket ja ohppet jierpmálašvuođa.
2 Mun attán didjiide buori oahpa,
allet vajáldahte mu oahpahusa.
3 Go mun bártnážin ledjen ruovttus
áhččán luhtte,
njuorasin ja eadnán áinnohažžan,
4 dalle áhčči oahpahii mu:
Doala gitta mu sániin,
doala mu báhkkomiid, de oaččut eallit.
5 Hága viisodaga, hága jierpmi,
ale vajáldahte
maid mun dutnje cealkkán
alege gáidda das.
6 Ale hilggo viisodaga,
de dat gáhtte du,
ráhkis dan, de dat várjala du.
7 Hága viissisvuođa,
dat lea buot mávssoleamos,
hága ipmárdusa buot dainna
mii dus lea.
8 Goarggut viisodaga,
de dat alida du,
jos don fátmmastat dan,
de dat buktá dutnje gudni.
9 Dat bidjá du oaivái
čáppa gudnegierddu,
dat geige dutnje hearvás kruvnnu.
10 Gula, bártnážan,
váldde vuhtii mu sániid,
de du eallinjagit šaddet eatnagin.
11 Mun oahpahan dutnje
viisodaga geainnu,
mun oahpistan du rivttes bálgáide.
12 Go don váccát daid,
de ii mihkkege hehtte du,
go don viegat, de it guossal.
13 Biso álo bagadusas
maid leat ožžon,
ane dan áimmuin,
dat lea du eallin.
14 Ale vácce ipmilmeahttumiid bálgá,
ale vuolgge dan geidnui
man bahát vádjolit,
15 divtte dan orrut alege vácce dan,
gáidda das ja mana meaddel.
16 Ipmilmeahttumat eai sáhte oađđit
muđui go leat dahkan bahá,
sidjiide eai boađe nahkárat
jos sii eai leat jorralahttán ovttage.
17 Vearrivuohta lea sin láibi,
veahkaváldi sin viidni.
18 Vanhurskásiid bálggis lea dego
iđedisguovssu
mii šaddá šearradeabbon
ahte šearradeabbon dassá go
lea olles čuvges beaivi.
19 Ipmilmeahttumiid geaidnu
lea nugo seavdnjatvuohta,
sii eai dieđe masa vedjet guossalit.
20 Bártnážan, gula maid mun dajan,
guldal dárkilit mu sániid.
21 Ale goassege luoitte daid
čalmmiidat ovddas,
vurke daid čiekŋalassii iežat váibmui.
22 Dat addet eallima dasa
gii daid gávdná,
dálkasa olles su rupmašii.
23 Várjal váimmot eambbo go
buot eará,
dainna go eallin vuolgá das.
24 Ale suova iežat njálmmi
sárdnut vearálaččat,
ale ane baksamiiddát behttosii.
25 Gehččoset du čalmmit
njuolga ovddos,
geahča dasa mii dus lea ovddabealde.
26 Dárko dan luotta man leat vázzimin,
de don jođát álo nana eatnama alde.
27 Ale spiehkkas olgeš alege
gurut beallái,
jorgal lávkkiidat bahás eret.