Neavvagat ja várrehusat
1 Bártnážan,
jos don leat addán dáhkádusa
lagamuččat ovddas,
addalan gieđaid vierroolbmuin,
2 de du sánit leat čatnan du,
dat maid leat cealkán, lea darvehan du.
3 Daga dasto ná, bártnážan,
vai gájut iežat,
go juo leat šaddan lagamuččat gihtii:
Mana hoahpus ja doarjal lagamuččat,
4 ale udno čalmmiidasat nahkáriid
alege oađđinmášu
čalbmerapmasiiddásat.
5 Gájo iežat dego gasella bivdis,
nugo loddi loddejeaddji gieđas.
6 Mana, láikkan, gotkka lusa,
geahča mo dat bargá ja šatta viissisin!
7 Das ii leat oaivámuš,
fáldi iige ráđđejeaddji,
8 muhto almmatge
dat háhká borramuša geasset
ja čohkke biepmu láddjenáigge.
9 Man guhká don veallát, láikkan,
goas don morihat ja lihkat?
10 Nohkas vel veahá,
ajihustte vel uhccánaš,
vuoiŋŋas ain bottoža ruossalas gieđaid,
11 de geafivuohta falleha du
dego rievvár,
vádjitvuohta vearjoolbmá láhkái.
12 Návccahis olmmoš, suohpáhis olmmái
sárdnu suorrenjuokčamiin,
13 časkkaša čalmmiid, rábasta julggiin
ja addá mearkkaid suorpmaiguin.
14 Behtolaš váimmuin
son hutká bahás juonaid,
dagaha álo riidduid.
15 Dan dihte su deaivida
fáhkkestaga lihkuhisvuohta,
čalbmeravkalanbottus
son doddjojuvvo cuovkkas,
iige leat dálkkas.
16 Guhtta ášši Hearrá vašuha,
čieža son fasttáša:
17 gorges čalmmit, behtolaš njuovčča,
gieđat mat golggahit vigihis vara,
18 váibmu mii hutká bahás ráđiid,
juolggit mat viegahit bahá,
19 vearreduođašteaddji gii gielástallá
ja dat gii dagaha riidduid
vieljažiid gaskii.
20 Bártnážan, doala áhčát báhkkomiid,
ale hilggo eatnát oahpahusa.
21 Ane daid álelassii váimmu vuostá,
čuolbmat daid čeabeha birra.
22 Dat láidejit du go don vádjolat,
várjalit du go don veallát,
ja go don gohccát, de dat sárdnot dutnje.
23 Báhkkon lea lámpá,
oahpahus lea čuovga,
cuiggodeaddji bagadus
lea eallima geaidnu.
24 Dat várjalit du du lagamučča áhkás,
vierronissona livttis njuokčamis.
25 Ale anistuva su čábbodahkii,
ale divtte su geasuhit iežat
geahčastagaidisguin.
26 Fuorrá sáhttá doalvut dus
vel maŋimuš láibevajahasage,
muhto náitalan nisson
lea bivdimin du heakka.
27 Gii sáhttá čohkket hilaid askásis
buollátkeahttá biktasiiddis?
28 Sáhttágo oktage vázzit hilaid alde
almmá boalddekeahttá julggiidis?
29 Nu geavvá maiddái dasa
gii veallá lagamuččas áhkáin:
Ii oktage gii duohtada su,
beasa ráŋggáškeahttá.
30 Ii oktage badjelgeahča suollaga,
go son suoláda go lea nelgon,
31 jos son gávnnahallá,
de son ferte máksit čiežageardásaččat
ja addit buot mii sus lea.
32 Jierpmeheapme lea dat
guhte furroša,
son duššada iežas.
33 Son oažžu das aivve
heahpada ja vahága,
iige su heahpat sihkkojuvvo goassege.
34 Dasgo boatnji balahahkesvuohta
lea garas,
máksobeaivvi son ii árpmit.
35 Soabahusruđain son ii beroš,
ii son mieđit, vaikko velá dáhtošit
addit sutnje ollu attáldagaid.