1 Bártnážan, ane áimmuin mu sániid
ja doala mu báhkkomiid.
2 Doala mu báhkkomiid,
de don oaččut eallit,
várjal mu oahpahusaid
dego čalbmegáhkát.
3 Čana daid suorpmaidasat,
čále daid váimmot távvalii.
4 Cealkke viisodahkii:
“Don leat mu oabbá”,
gohčot ipmárdusa ustibin.
5 De dat várjalit du eará olbmá áhkás,
vierronissonis gii dahká sániidis livttisin.
6 Go mun geahčastin láseráigge
iežan viesus, čeargalasa čađa,
7 de mun oidnen
dáidemeahttumiid joavkkus ovtta,
mun áicen jierpmehis nuorra olbmá.
8 Son manai gáhtaráigge
nissona nurkki guora,
váccii geainnu su vistti guvlui.
9 Lei juo sevnnjodeamen,
beaivi lei jorramin sevdnjes idjan,
10 ja nisson bođii su ovddal
fuorrábiktasat gárvun
ja šluohkes áigumušaiguin.
11 Son lea šloabmái ja veaidaláđas,
ruovttus son ii biso –
12 fargga son lea gáhtas,
fargga márkanšiljus,
juohke nurkki duohken son njágada.
13 Son váldá bártni gitta ja cummista su,
geahččá sutnje heabuheamit ja dadjá:
14 “Lean lohpidan oaffaruššat
searvevuođaoaffara,
ja odne mun ollašuhtán iežan lohpádusa.
15 Danin mun vulgen olggos
du ovddal,
aiddo du mun ohcenge, ja de gávdnen du.
16 Mun lean lebbon ránuid seaŋgasan,
girjjat egyptalaš beallemasránuid,
17 oađđensadjásan mun lean riškkuhan
myrra, aloe ja kanela.
18 Boađe, de besse gárihuvvat
ráhkisvuođas,
hávskkohaddu ráhkisteamis
gitta iđida rádjái!
19 Mu boadnji ii leat ruovttus,
son lea vuolgán guhkes mátkái.
20 Ruhtaburssa son válddii mielddis,
son máhccá easkka láđasmánu.”
21 Son viehttala nuorra olbmá
sániidisguin,
behtolaš baksamiiguin son dájuha su.
22 Dallánaga son čuovvula nissona,
dego vuoksá mii galgá njuvvojuvvot,
nugo sarvva mii manná gillii.
23 Nu son gáhččá gillii dego loddi
iige ipmir
ahte dat máksá su heakka,
ovdal go njuolla ludde su vuoivasa.
24 De gullet dal mu, mánáidan,
guldalehket maid mun dajan.
25 Allet fillehala vierronissona
geainnuide,
allet čádjádala su bálgáide,
26 danne go son lea časkán
eatnagiidda jápminhávi,
son lea goddán lohkameahttumiid.
27 Su viesus lea geaidnu
jábmiidáibmui,
dat manná vuolás jápmima gámmáriidda.