1 Salomo, Davida bártni, Israela gonagasa, sátneláskkut.
2 Oahpahehkoset dat viisodaga
ja bagadusa,
vai olmmoš ádde jierpmálaš sániid
3 ja váldá vuostá bagadusa
jierpmálašvuhtii, vanhurskkisvuhtii,
vuoigatvuhtii ja vuoigatlašvuhtii.
4 Ožžoset dáidemeahttumat dain dáiddu,
nuorat dieđu ja dárkilvuođa.
5 Viissisge viisu go gullá daid,
jierpmálašge oažžu dain bagadusa,
6 oahppá ipmirdit sátnevádjasiid
ja veardádusaid,
ádde viisáid sániid ja árvádusaid.
7 Hearrá ballu lea dieđu álgu,
muhto jalla badjelgeahččá
viisodaga ja bagadusa.
Ale vajáldahte maid leat oahppan!
8 Bártnážan, guldal áhčát cuiggodusa,
ale hilggo eatnát oahpahusa!
9 Dat lea čáppa gudnegierdu du oaivái,
viđji mii čiŋaha du čeabeha.
10 Go suttolaččat fillejit du, bártnážan,
de ale mieđit 11 go sii dadjet:
“Vuolgge minguin vuođgŋit varaid,
sokčat vigihemiid somá dihte!
12 Njielastehkot sin eallinaga
dego jábmiidáibmu,
obbanaga nugo hávdi!
13 Mii fidnet buotlágáš
mávssolaš dávviriid,
deavdit viesuideamet stajádusain.
14 Don beasat juogadit sállaša minguin,
ruhtabursa mis lea oktasaš.”
15 Bártnážan, ale searvva sidjiide,
ale goassege duolmmas sin bálgáid!
16 Sii dopmet bahá guvlui,
gáhččet golggahit vara.
17 Eai lottit áicca fierpmi,
vaikko dat lebbejuvvo daid oaidnut,
18 ja dát olbmát leat vuođgŋimin
iežaset vara,
iežaset heakka sii leat bivdimin.
19 Nu geavvá juohkehažžii
gii bivdá vearrevuoittu:
Dat váldá heakka das gii dan fidne.
Viisodat sárdnu
20 Viisodat čuorvu gáhtain,
márkanšiljuin dat diktá jienas gullot.
21 Šlábmás gáhtačiegain dat čuorvu,
sárdnu gávpoga poarttain:
22 “Man guhká dii dáidemeahttumat
ráhkistehpet dáidemeahttunvuođa?
Man guhká dii bilkideaddjit
illudehpet bilkideapmái
ja dii jallat vašuhehpet dieđu?
23 Jorgalehket ja jeagadehket
mu cuiggodusaid!
Mun muitalan didjiide iežan dáhtu,
dieđihan didjiide sániidan.
24 Mun čurvon,
muhto dii ehpet dáhtton gullat,
mun várrejin,
muhto ii oktage beroštan.
25 Dii ceakkasteiddet
buot mu neavvagiidda,
ehpet viššan gullat mu cuiggodusaid.
26 Dan dihte mun boagustan
go lihkuhisvuohta deaivida din,
mun bilkidan go boahtá dat
maid dii gáfestuvvabehtet,
27 go ballu falleha din
dego garra biegga
ja lihkuhisvuohta nugo riđđu,
go áŧestus ja heahti deaivida din.
28 Dalle dii čuorvubehtet mu,
muhto mun in vástit,
dii ohcabehtet mu, muhto ehpet gávnna.
29 Dii vašuheiddet dieđu
ehpetge dáhtton ballat Hearrás,
30 dii ehpet viššan guldalit mu neavvaga,
muhto badjelgeahčaidet mu cuiggodusaid.
31 Danne dii borrabehtet
daguideattet šattuid
ja gallánehpet juonaideattetguin.
32 Jorraleapmi goddá dáidemeahttumiid,
jallaid oadjebasvuohta duššada sin.
33 Muhto dat gii mu gullá,
beassá ássat oadjebassan,
son ii dárbbaš ballat mange bahás.”