VIĐÁT GIRJI
Sálbma 107
1071 Rámidehket Hearrá,
dasgo son lea buorre,
su árbmu bistá agálaččat.
2 Nu celkoset dat
geaid Hearrá lea lonistan,
geaid son lea čoavdán heađis
3 ja čohkken buot eatnamiin
nuortan ja oarjin, davvin ja lullin.
4 Muhtumat sis čádjádalle meahccái
ja ávdin báikkiide
eaige gávdnan gávpoga gosa ássat.
5 Sii nelgo ja goike,
sin siellu vuoimmehuvai.
6 Dalle sii heađisteaset čurvo Hearrái,
ja son gájui sin sin áŧestusain.
7 Son oahpistii sin rivttes geidnui,
gávpogii gosa sii besse ássat.
8 Giitoset sii Hearrá su buorrevuođas,
rámidehkoset oavdudaguin
maid son lea dahkan olbmuide!
9 Son addá juhkat daidda
geat leat goikan,
galleha buriiguin daid geat leat nelgon.
10 Muhtumat sis čohkkájedje
seavdnjadasas ja jápminsuoivanis,
vártnuheapmin
ja ruovdeláhkkiide čadnojuvvon,
11 danne go sii ledje leamas
vuostehágolaččat Ipmila gohččumiidda
ja badjelgeahččan Alimusa neavvagiid.
12 Son vuolidii sin gillámušaiguin,
sii guossaledje
eaige ožžon veahki ovttasge.
13 Dalle sii heađisteaset čurvo Hearrái,
ja son besttii sin sin áŧestusain.
14 Son doalvvui sin olggos
seavdnjadasas ja jápminsuoivanis
ja botkii sin láhkkiid.
15 Giitoset sii Hearrá su buorrevuođas,
oavdudaguin maid son lea dahkan olbmuide!
16 Son biđge veaikeuvssaid
ja cuvke ruovdesmarttiid.
17 Muhtumat sis buhce suttuideaset dihte
ja gárte gillát vearredaguideaset geažil.
18 Sii fasttášedje buot borramuša,
sii ledje juo boahtán
jápmima poarttaid lahka.
19 Dalle sii heađisteaset čurvo Hearrái,
ja son besttii sin sin áŧestusain.
20 Son vuolggahii sánis ja buoridii sin,
son besttii sin hávddis.
21 Giitoset sii Hearrá su buorrevuođas,
oavdudaguin maid son lea dahkan olbmuide!
22 Buktoset sii giittusoaffara
ja muitalehkoset ávvudemiin su daguid!
23 Muhtumat sis manne skiippaide
ja gávppašedje stuorra mearaid alde.
24 Sii oidne Hearrá daguid,
čiekŋalasaid oavdduid,
su stuorra oavdudaguid.
25 Son gohčui, ja šattai riđđudálki,
meara bárut badjánedje.
26 Sii loktanedje almmi guvlui
ja vudjo čiekŋalasaide,
oasehisvuođas sin siellu hearddohuvai.
27 Sii sugadedje, sii suibo
dego gárrenolbmot,
sin máhtus ii lean ávki.
28 Dalle sii heađisteaset čurvo Hearrái,
ja son besttii sin sin áŧestusain.
29 Son divttii riđu šaddat goalkin,
ja meara bárut jaskkodedje.
30 Sii illosedje go golkii,
ja son doalvvui sin dan hápmanii
gosa sii ledje áigumin.
31 Giitoset sii Hearrá su buorrevuođas,
oavdudaguin maid son lea dahkan olbmuide!
32 Gulahehkoset sii su gudni
go su álbmot čoaggana,
su rámádusa vuorrasiid čoakkalmasas!
33 Son dahká eanuid ávdin meahccin,
goikada čáhccás ádjagiid,
34 dahká šattolaš eatnama sálteeanamin
dan ássiid bahávuođa dihte.
35 Son rievdada meahci jávrin
ja goikeeatnama čáhceájan.
36 Dasa son diktá nealgu olbmuid ássat,
ja sii huksejit alcceseaset gávpoga.
37 Sii gilvet bealdduid
ja ráhkadit viidnegárddiid,
sii čohkkejit šattu valjis.
38 Son buressivdnida sin
ja álbmot eatnána sakka,
ja sin oamit lassánit.
39 Muhto jos sii fas uhccánit
ja nuonddahallet áŧestusaide,
oasehisvuhtii ja morrašii,
40 de son golggaha badjelgehččojumi
oaivámuččaid badjelii
ja diktá sin čádjádallat
bálggeskeahtes ávdin meahccái.
41 Muhto váivvášiid son bajida
vártnuhisvuođas
ja dahká sin sogaid stuorisin
dego sávzaeallu.
42 Vuoigatlaččat oidnet dan ja illudit,
muhto buot bahávuohta
ferte jávohuvvat.
43 Viissis váldá dan vuhtii
ja guorahallá Hearrá buriid daguid.