Sálbma 20
1 Koarrajođiheaddjái. Davida sálbma.
2 Vare Hearrá vástidivččii dutnje
heahtebeaivvi,
vare Jakoba Ipmila
namma várjalivččii du!
3 Vare son vuolggahivččii dutnje veahki
bassibáikkistis
ja attášii dutnje doarjaga Sionis.
4 Vare son muittášii buot
du borramušoaffariid
ja válddášii bures vuostá
du boaldinoaffariid. Sela
5 Vare son attášii dutnje dan
maid du váibmu sávvá,
ja ollašuhtášii buot du áigumušaid.
6 De mii beassat ávvudit du bestojumi
ja loktet leavgga Ipmileamet nammii.
Vare Hearrá deavddášii buot du átnumiid!
7 Dál mun dieđán ahte Hearrá addá
vuidojuvvon gonagassasis vuoittu.
Son vástida sutnje bassi almmistis,
gádju su olgeš gieđainis.
8 Muhtumat dorvvastit vovnnaide,
muhtumatgis heasttaide,
muhto mii dorvvastit Hearrá,
Ipmileamet, nammii.
9 Dot vuollánit ja gahččet,
muhto mii čuožžut ja ceavzit.
10 Hearrá, atte gonagassii vuoittu!
Vástit midjiide dan beaivvi
go mii čuorvut.