Sálbma 32
1 Davida oahpahansálbma.
Ávdugas dat gean rihkkumat
leat ándagassii addojuvvon,
gean suttut leat čihkkojuvvon.
2 Ávdugas dat olmmoš
geasa Hearrá ii logahala suttu
ja gean vuoiŋŋas ii leat
behtolašvuohta.
3 Nu guhká go mun orron jávohaga,
de mu dávttit sotne,
mun luibmen geažos beaivvi.
4 Du giehta dettii mu
lossadit ijatbeaivái.
Mu vuoibmi jávkkai dego
lávttadas geasi báhkas. Sela
5 Mun dovddastin suddon dutnje,
mun in čiehkan rihkkumiiddán.
Mun dadjen: “Mun dovddastan
suttuidan Hearrái.”
Ja don váldet eret
mu suddovealggi. Sela
6 Dan dihte du oskkáldas olbmot
rohkadallet du áŧestusa áiggi.
Vaikko stuorra čázit badjánivčče,
de dat eai olat sin.
7 Don leat mu suodji,
don várjalat mu áŧestusas,
don divttát bestojumi ávu
čuodjat mu birra. Sela
8 Mun oahpahan du
ja čájehan dutnje geainnu
man galggat vádjolit,
mu čalmmit gehččet du lávkkiid.
9 Ale leage dego jierpmehis eallit,
nugo heasttat dahje mulat
maid ferte dápmat suittiiguin
ja njálbmeruvddiiguin,
muđui dat eai boađe du lusa.
10 Ipmilmeahttumis leat ollu váivvit,
muhto Hearrá árbmu
birastahttá dan gii dorvvasta Hearrái.
11 Illudehket Hearrás!
Ávvudehket, dii vanhurskásat!
Čurvot ávus, dii geaid váibmu
lea vuoigatlaš!