Sálbma 51
1 Koarrajođiheaddjái. Davida sálbma, 2 dalle go profehta Natan lei fitnan su luhtte maŋŋil go David lei guoskan Batsebai.
3 Ipmil, leage munnje árbmugas
buorrevuođastat,
sihko mu rihkkumiid
stuorra árbmugasvuođat dihte.
4 Basa mu buhtisin sivalašvuođas,
buhtis mu mu suttus.
5 Mun dovddan rihkkumiiddán,
mu suddu lea álelassii mu ovddas.
6 Aivve du vuostá
mun lean suddudan,
mun lean dahkan dan mii lea bahá
du čalmmiin.
Don leat vuoigadis
go bijat mu vástidit,
vuoiggalaš go dubmet mu.
7 Sivalažžan mun riegádin,
suttus mun sahkanin
eadnán goŧŧui.
8 Don dáhtut duohtavuođa
mu siskkildassii,
oahpat mu váibmui viissisvuođa.
9 Buhtis mu suttus isopiin,
basa mu vielgadeabbon
go muohta.
10 Suova mu dovdat ávu ja ilu,
divtte ávvudit daid dávttiid
maid cuvkejit.
11 Jorgal muođuidat
eret mu suttuin
ja sihko mu suddovealggi.
12 Ipmil, sivdnit munnje
buhtis váimmu,
atte munnje ođđa ja nana vuoiŋŋa.
13 Ale áje mu muođuidat ovddas,
ale váldde mus eret iežat bassi vuoiŋŋa.
14 Atte munnje fasttain
bestojumi ávu,
atte munnje mieđamánas vuoiŋŋa
ja doarjjo mu.
15 Dalle mun oahpahan
suttolaččaide du geainnuid,
vai sii máhccet du lusa.
16 Beastte mu varradaguin, Ipmil,
mu bestojumi Ipmil.
Dalle mun rámidan illudemiin
du oskkáldasvuođa.
17 Hearrá, rabas mu baksamiid,
de mu njálbmi gulaha du rámádusa.
18 Jos mun buvttán dutnje
njuovvanoaffara,
de don it geahča dan beallái,
mu boaldinoaffarisge
don it fuola.
19 Doddjojuvvon vuoigŋa
lea mu oaffar,
cuovkanan váimmu
don it hilggo, Ipmil.
20 Daga árpmustat bures Sionii,
hukse Jerusalema muvrraid!
21 Dalle don válddát vuostá
rivttes oaffariid,
boaldinoaffariid ja ollesoaffariid.
Dalle oaffaruššojuvvojit vuovssát
du áltára alde.