Sálbma 63
1 Davida sálbma, dalle go son lei Juda meahcis.
2 Ipmil, mu Ipmil,
du mun ozan.
Mu siellu goikaluvvá dutnje,
mu rumaš ohcala du
guorba meahcis gos ii leat čáhci.
3 Bassibáikkis mun beasan geahččat du,
oaidnit du fámu ja hearvásvuođa.
4 Du árbmu lea buoret go eallin.
Mu baksamat rámidit du.
5 Mun máinnun du
nu guhká go ealán,
mun lokten gieđaid du guvlui.
6 Dalle mu siellu gallehuvvo
dego buoiddes borramušain,
ja mun rámidan du
ávvudeaddji baksamiiguin.
7 Mun muittán du
go veallán seaŋggas,
mun jurddašan du idjagohcinvuorus.
8 Dasgo don leat leamaš
mu veahkki,
du soajáid suoivanis mun beasan ávvudit.
9 Mun goattan dutnje,
du olgeš giehta doarjala mu.
10 Muhto dat geat bivdet
mu heakka,
mannet eatnama čiekŋalassii.
11 Sii addojuvvojit miehki háldui,
sii šaddet riebaniid sálašin.
12 Muhto gonagas illuda Ipmilis.
Buohkat geat vurdnot Ipmila nammii,
besset ávvudit,
muhto gielástalliid njálbmi
dahppojuvvo.